El XIII Festival Internacional de Gaita de La Villa celebra la so xornada cimera

31 agostu 21:18 2018 Imprimir

Con un conciertu del grupu llionés Tarna, esti xueves entamaba nueva edición del FIOG, el Festival Internacional de Gaita de La Villa que va celebrase hasta’l 2 de setiembre, con un ampliu programa d’actividaes que va convertir a Villaviciosa na capital de la música asturiana.

La xornada del xueves tuvo’l so entamu nel Teatru Riera, onde’l grupu Llionés Tarna traxo’l folk de la ribera y la montaña del otru llau del cordal y fízolo con invitaos como Dani Fernández, Rodrigo Joglar o la Banda de Gaites La Kadarma cola que peslló la so actuación. Tres del conciertu, nel qu’amosaron cancios de los sos tres discos finando con “El hombre que tenía una vaca”, la música folk treslladose al Pub Trasgu, onde’l grupu Alienda ufrió tamién una revisión de les sos composiciones dende l’entamu del grupu hasta anguaño, con dalguna de les caberes qu’entá nun tien títulu.

El FIG ta entamáu pela Banda de Gaites Villaviciosa-El Gaiteru cola collaboración del Conceyu de Villaviciosa y el sofitu d’otres entidaes, Grupu El Gaiteru, ACOSEVI, Atenéu Obreru de Villaviciosa, y hosteleros, comerciantes y llagareros de Villaviciosa.

Esti sábadu, 1 de setiembre, el FIG va coincidir cola celebración de la Fiesta de la Sidra, que se va celebrar mientres la mañana na Plaza del Conceyu. L’actu estrella de la xornada va ser el XIII Festival de Bandes de Gaites del FIG, que se va celebrar n’El Pelambre. El programa inclúi amás un mercáu y l’hostelería local, representada por ACOSEVI, va ufiertar mientres la Fiesta de la Sidra y el FIG, unes Xornaes Gastronómiques, Les Tables Gaiteres.

Loading Facebook Comments ...