El X Festival d’andar per casa n’Avilés celebrase esti vienres con nuevu formatu

El X Festival d’andar per casa n’Avilés celebrase esti vienres con nuevu formatu
17 xunetu 13:18 2020 Imprimir

El décimu Festival d’andar per casa n’Avilés celebrase esti vienres con nuevu formatu y llimitación d’aforos. El puntu d’alcuentru ye la plaza Alfonso VI, frente al antiguu Correos, a les 20 hores y hai qu’allegar con ropa d’andar per casa y mázcaru. Nesta ocasión plantégense trés espacios abiertos con trés rutes culturales y tou tipu d’actividaes: música, proyecciones y danza.

Coincidiendo cola décima edición, el Festival d’andar per casa, el conocíu eventu cultural qu’abría les cases de vecines y vecinos d’Avilés para acoyer distintes actividaes culturales, va tener un formatu afechu a los tiempos de Nueva Normalidá. La pandemia fíxonos pasar enforma tiempu en casa, esfrutar d’elles, y tamién reinventanos. Sicasí, dende la Conceyalía de Mocedá propónse que 2020 merezse qu’esta vegada saquemos les cases a la cai y celebremos la vida cultural y artístico de la ciudá nel mesmu formatu caseru, pero con aire llibre y les midíes de seguridá que precisamos cubrir como’l mázcaru y el distanciamientu social.

Va ser ocasión de treslladar l’espaciu priváu escontra’l públicu, a la inversa de como se llevam faciendo toos estos años. Les actividaes van tener llugar en trés espacios abiertos d’Avilés con aforu llindáu y guardando les midíes de distanciamientu social y ellí van acoyer distintes actuaciones.

Anguaño, la programación toma un ampliu númberu de propuestes culturales de distintes clases y para tolos gustos: un quizz-bollu, dances del mundu, proyecciones artístiques, xuegos tradicionales y música en directu son dalgunes de les propuestes, anque nun van faltar guiños a tou asoceder mientres el períodu de cuarentena: los vídeu-retos de les redes sociales, el papel hixénicu o’l lleldu van tener tamién el so espaciu mientres esti festival.

Les persones asistentes tán convidaes a participar cola ropa propio d’andar per casa: pijamas, albornoces, zapatielles, pantuflas, rulos, mandiles… y el mázcaru, de xacíu.

El puntu d’alcuentru pal empiezu del festival y pa quien quiera participar ye la Plaza d’Alfonso VI (Cai Ferrería, frente al antiguu Correos) a les 20 hores d’esti vienres 17 de xunetu. Na mesma plaza les y los participantes van poder recoyer y atrezarse col tradicional “ticket d’entrada”, que se traduz nun mandil super trendy d’andar per casa iguáu anguaño integralmente pol grupu motor. Nesti mesmu momentu partirá la programación, que va consistir en trés rutes distintes con trés actividaes culturales de 50 minutos de duración caúna, con un alcuentru final de zarru.

L’actividá ye gratuita y ensin inscripción previa.