Portada Educación El Vicerrector d’Estensión inaugura la esposición “Biblia y Reforma”

El Vicerrector d’Estensión inaugura la esposición “Biblia y Reforma”

by redacción asturnews

El vicerrector d’Estensión Universitaria y Proyección Internacional, Francisco José Borge, inauguró esti xueves, na Sala central de la Biblioteca del Edificiu Históricu, la esposición “Biblia y Reforma”, entamada pola Universidá d’Uviéu y el Conseyu Evanxélicu del Principáu d’Asturies (CEDPA), con motivu del 500 aniversariu de la Reforma Protestante.

El vicerrector mentó nesta inauguración la importancia cultural que tuvo, a partir del sieglu XVI, el fechu de poner los testos bíblicos a disposición de los llectores nes llingües vernácules. Coles mesmes, destacó que la Universidá ta presente nesta celebración averando a la sociedá los exemplares pervalibles que curia, y dexando que puedan contemplase de cerca.

Tratase d’ediciones d’induldable interés históricu y bibliográficu, como la Biblia de Ferrara (1553), traducción del Antiguu Testamentu por xudíos españoles; la Políglota d’Amberes (1568-1572), patrocinada por Felipe II; la Biblia d’osu de Casiodoro de Reina (1569) –primer traducción completa de la Biblia al español dende les llingües orixinales– y la Biblia del cántaru (1602) de Cipriano de Valera, que ye una revisión de la primera y una de les traducciones del testu bíblicu más espublizaes nel mundu de fala hispana, nes sos socesives revisiones.

El director de la Biblioteca de la Universidá, Ramón Rodríguez, destacó la importancia de los mentaos exemplares, y el fechu de que na amuesa “les biblies católiques y les protestantes conviven en bona harmonía”. Nel actu inaugural tamién tuvo presente’l presidente del CEDPA, Luis Rubiales, qu’estimó a la Universidá la organización de l’amuesa y destacó cómo “pa la Reforma del sieglu XVI yera prioritariu traducir los testos bíblicos orixinales a les llingües locales”

La esposición, que cunta cola collaboración de la Sociedá Bíblica, va permanecer abierta del 5 al 31 de mayu, de llunes a vienres, n’horariu de 10 a 11:30 hores y de 17 a 20 hores.

Per otru llau, tolos xueves del mes de mayu va desenvolvese nel Edificiu Históricu un ciclu de conferencies sobre la Biblia y la Reforma. Güei, a les 19:30 hores, na Aula Magna del Edificiu Históricu, José Luis Andavert, director xeneral de la Sociedá Bíblica d’España, va ufiertar la conferencia “La Biblia, el gran códigu de la cultura universal. Reflexones en redol al 500 aniversariu de la Reforma Protestante”. La entrada ye llibre hasta completar aforu.

Ciclu de conferencies

• 4 de mayu. Juan Luis Andavert, presidente de la Sociedá Bíblica Española. “La Biblia, el gran códigu de la cultura universal. Reflexones en redol al 500 aniversariu de la Reforma Protestante”. Aula Magna. 19:30 h.

• 11 de mayu. José Moreno Berrocal, pastor protestante ya Investigador sobre la Reforma. “La Reforma Protestante y la so influencia al traviés del tiempu”. Aula Magna. 19:30 h.

• 18 de mayu. Constantino Bada, párrocu diocesanu y doctor pola Universidá de Salamanca. “La Biblia del Osu de Casiodoro de Reina (Basilea 1569): una xoya desconocida del Sieglu d’Oru español”. Aula Magna. 19:30 h.

• 25 de mayu. Manuel de Llión y José Luis Fernández, investigadores sobre Protestantismu. “¿Hubo reforma n’España?, ¿y n’Asturies?”. Aula Gradiada. 19:30 h.

Tamién te podria gustar