El vicepresidente cubanu entrega n’Uviéu nuevos fondos pal Muséu de Colombres

Los fondos del Muséu de la Emigración, allugáu na llocalidá de Colombres, siguen medrando. El vicepresidente’l Conseyu de Ministros de Cuba, José Ramón Fernández, entregó-y esta mañana n’Uviéu al presidente’l Principáu, Vicente Álvarez Areces, nuevos documentos xeneraos pola gran afluencia d’asturianos a Cuba na dómina d’entesieglos que sedrán catalogaos y custodiaos nel equipamientu cultural del oriente asturianu.

Fernández, d’ascendencia asturiana, abrió güei una visita oficial de dos díes con una comparecencia pública xunta Areces na que sorrayó la candialidá de les rellaciones ente los Gobiernos d’Asturies y Cuba nos últimos 18 años, “ensin importar el presidente o el partíu políticu” que tuviera al frente l’Executivu asturianu en cada momentu.

Nuna rueda de prensa a la que tamién asistieron la embaxadora de Cuba n’España, Isabel Allende, y la conseyera de Presidencia, María José Ramos, el vicepresidente cubanu aprovechó pa denunciar el reciente refuerzu’l bloquéu económicu impuestu a la isla polos Estaos Xuníos, que según aseguró “va contra lo humano, lo económico y lo xusto”, y denigró al actual presidente norteamericanu, George W. Bush, como’l peor de los mandatarios posibles al frente de la Casa Blanca.

Na so breve estancia n’Asturies, José Ramón Fernández tien previsto asistir, ente otros actos, a una cellebración del décimu aniversariu del hermanamientu ente les ciudaes de Xixón y L’Habana, alcuentros con estremaes organizaciones que desendolquen proyectos d’ayuda humanitaria en Cuba y una xuntanza con más de 30 empreses asturianes interesaes n’invertir nel país caribeñu.