Portada Música El V Festival del Arcu Atlánticu va desenvolvese del 23 de xunetu al primeru d’agostu

El V Festival del Arcu Atlánticu va desenvolvese del 23 de xunetu al primeru d’agostu

by redacción asturnews
Cartelu del primer Arcu Atlánticu

La V Edición del Festival Arcu Atlánticu que va tener llugar en Xixón del 23 de xunetu al 1 d’agostu de 2016, foi autorizada esti día pola xunta Rectora de la Fundación Municipal de Cultura, Educación y Universidá Popular.

La Xunta Rectora de la Fundación Municipal de Cultura, Educación y Universidá Popular, acaba d’aprobar el programa de la quinta edición del Festival ArcuAtlánticu que se va celebrar en Xixón del 23 de xunetu al 1 d’agostu de 2016. Votaron a favor los grupos políticos de Foru, Partico Popular, Xixón si puede y Ciudadanos, y votaron en contra’l Partíu Socialista ya Izquierda Xunida.

El programa presentáu a la Xunta Rectora modificóse tocantes a los sos enfoques y conteníos, superando asina les reticencies manifestaes en sesiones anteriores polos grupos políticos representaos nel órganu xestor de la Fundación Municipal de Cultura, Educación y Universidá Popular.
Divertia tamién participa nesti festival con una parte importante de la programación del Festival na so aguada gastronómico y turístico.

El Arcu Atlánticu 2016 configúrase como una PLAZA PÚBLICA DE LA CULTURA formada por una CONFLUENCIA D’ACCIONES CULTURALES con una reflexón y un oxetivu concretu que la so suma constitúi l’oxetivu xeneral del eventu: identidá y memoria.

El Festival Arcu Atlánticu de Xixón/Xixón ye un eventu cultural de calter abiertu y participativu que naz nel añu 2012 y llega a la so quinta edición esti 2016, cola cultura común atlántica como elementu vertebrador de la so programación. Esta edición dedicase a esquizar los conceutos d’Identidá y Memoria, proponiendo un ampliu espaciu de programación abiertu a tolos públicos y compartíu con distintes ciudaes europees y conceyos asturianos al traviés de les sos manifestaciones culturales.

La identidá y la memoria buscase nel territoriu que rexistra les buelgues del pasáu y conforma la cultura de los sos habitantes. Cultura que se manifiesta con semeyances y diferencies significatives a les llongura del espaciu atlánticu européu. Por eso, el Festival ye un proyectu polifacéticu qu’integra les distintes árees culturales: música, teatru, danza, folclore, lliteratura, llingües, artes tradicionales, oficios y tou tipu de manifestación creativa.

El Festival Arco Atlánticu tien un conteníu multidisciplinar en redol a tres eje esenciales nel desenvolvimientu socioeconómico de Xixón. Per un sitiu el sector turísticu y la promoción de la ciudá p’atraer visitantes del ámbitu rexonal nacional y de los países atlánticos más cercanos. Nesti sentíu la ufierta cultural, y especialmente el programa gastronómicu que se presenta nel festival, son elementos con una gran fuerza d’atracción, tantu pal públicu local como pa los turistes que vienen pel branu a Xixón/Xixón.

Per otru llau l’espardimientu de la cultura atlántica como un elementu vertebrador y potenciador del intercambiu con otres ciudaes atlántiques, abrir a la conocencia de les sos peculiaridaes nel contestu d’una cultura con elementos compartíos, dientro d’un espaciu xeográficu européu común.

D’últimes la repercusión económica que tien esti tipu d’eventos na ciudá, considerando especialmente l’establecimientu y desenvolvimientu de plataformes comerciales como’l Salón de Agroalimentación y Turismu que tien por oxetivu amosar y facilitar la vienta a productores y distribuidores d’estos sectores, tantu de nivel nacional como internacional. Asina mesmu poténciense los fluxos de turismu ente les ciudaes y territorios implicaos. Nos dos ediciones celebraes foise ampliando la participación de productores y la presencia de distribuidores internacionales. Tamién se realizaron campañes turístiques específiques nes ciudaes participantes coles mires de reforzar la conocencia d’estos llugares y amontar l’arribación de visitantes.

Esti ye un festival pa tolos públicos, con una programación especialmente dedicada a los neños nel Espaciu Arcu Infantil. El festival convoca a artistes, ceadores y agrupaciones culturales, pero tamién a profesionales, axentes comerciales y turísticos. La redolada del Puertu Deportivu ye’l llugar onde s’instalen les carpes y escenarios del Festival. A estos espacios suman otros equipamientos culturales de la ciudá como los museos, el Centru de Cultura Antiguu Institutu, el Teatru Xovellanos y el Xardín Botánicu, ente otros.

Tamién te podria gustar