El TSX d’Asturies anula’l nomamientu a deu en 299 puestos del Principáu

05 05:33 2010 Imprimir

Nel día de güei el TSX d’Asturies apurrió a los trés miembros del Conceyu por Otra Función Pública n´Asturies responsables del recursu contenciosu – alministrativu la Sentencia nº 1208/10, de 29 d’ochobre, na que s’anula nuevamente’l sistema dixital de nomamientos de funcionarios que yá fuera declaráu illegal na anterior sentencia de 30 d’abril de 2010 ( 281 puestos de Xefes de Serviciu, Coordinadores , Asesores y similares, ampliaos en 10 más por Autu de 22 de xunu de 2010), anulación que s’estiende a otros ocho puestos más creaos con posterioridá.

El Gobiernu del Principáu d’Asturies, llueñe de cumplir de forma responsable los distintos resolvimientos xudiciales que dende l’añu 2009 vienen declarando la illegalidá del usu masivu de la ” llibre designación” como métodu de nomamientu de funcionarios, en consonacia cola xurisprudencia constante y uniforme del Tribunal Supremu, y sustituyir esti procedimientu escepcional y estraordinario pol normal y ordinariu del concursu de méritos; entró nuna carrera allocada de rebeldía frente al Derechu, aprobando una nueva relación de puestos de trabayu’l 18 de marzu de 2009, qu’agora s’anula, na que se caltien el métodu del “deu” pa los puestos nos que yá se declaró ilícitu, y estiéndese a dellos más, que de nuevu declárense illegales.

Les sentencies anteriores del TSXA nun fueron executaes hasta la fecha porque’l Gobiernu asturianu, actuando irresponsablemente col dineru de los ciudadanos y ciudadanes d’Asturies, decidió recurriles en casación ante’l Tribunal Supremu, a sabiendes de la imposibilidá xurídica de que los recursos puedan espolletar, nuna política de “tierra quemada” que pretende treslladar a los futuros gobernantes una Función Pública caótica y absolutamente degradada.

“Cola fin d’echar la recuarta a esti estáu de coses, manifiestamente lesivu pa los intereses d’Asturies”, el Conceyu por Otra Función Pública n´Asturies anuncia que va solicitar la execución provisional de la sentencia.

  Categories:
Loading Facebook Comments ...