El Tribunal Supremu refuga «vulneración de derechos» nel retayu horariu de Relixón

El Tribunal Supremu vieno acabante d’envalorar un recursu del Principáu contra’l contenciosu presentáu pol Arzobispáu pola planificación de l’asignatura en primeru de Bachilleratu y refuga qu’esista “vulneración de Derechos Fundamentales a la igualdá y non discriminación”, tal como aducía’l Tribunal autonómicu na so decisión, d’ochobre de 2015.

El Tribunal Supremu envaloró’l recursu presentáu pol Gobiernu d’Asturies a la sentencia del Tribunal Cimeru de Xusticia d’Asturies (TSXA) qu’anulaba’l Decretu de la Conseyería d’Educación 43/2015 no que fai a l’asignatura de Relixón en Primeru de Bachilleratu.Según la sentencia, l’Altu Tribunal nun considera qu’esista “vulneración de Derechos Fundamentales a la igualdá y non discriminación”, tal como aducía’l Tribunal autonómicu na so decisión, d’ochobre de 2015.

La sala respondió asina ante’l recursu interpuestu pol Lletráu del Serviciu Xurídicu del Principáu d’Asturies contra’l recursu presentáu pol Arzobispáu d’Uviéu contra’l Decretu. L’Arzobispáu d’Uviéu interpunxo un recursu contenciosu-alministrativu contra’l decretu d’Educación nel que solicitaba la midida cautelarísima de suspensión del testu por considerar que se retayaba l’horariu de l’asignatura de Relixón.

L’Arzobispáu criticaba qu’en Segundu de Bachilleratu nun s’ufiertara l’asignatura de Relixón y en primero enzancárase la so llibre elección y amenorgárase el so horariu.