El Tribunal Superior de Xusticia fai firme la sentencia que-y devuelve la llicencia a Radio Sele

Yá hai sentencia firme y definitiva. Los responsables de Radio Sele recibieron ayeri la notificación de que la decisión del Tribunal Superior de Xusticia d’Asturies qu’obliga al Principáu a devolve-y la llicencia a la emisora nun almite yá recursu, depués que l’altu tribunal resolviere les notes aclaratories a la sentencia que permanecíen pendientes d’análisis xudicial.

Eses notes referíense esencialmente a cuestiones técniques menores, ente elles errates nun apellíu de la parte demandante, y torgaben que la sentencia fora dafechu firme. Agora, el Principáu nun podrá retrucar a la decisión xudicial nin nel conteníu -yá pasó’l plazu establecíu pa ello- nin pola so forma.

Lo qu’inda nun se sabe con precisión ye cuándo s’aplicará la sentencia. Responsables de Radio Sele aconceyarán nos prósimos díes con representantes xurídicos de l’Alministración autonómica pa reclamar la devolución de la llicencia lo más darréu posible pa que la emisora puea funcionar con normalidá y ampliar el so horizonte de conteníos, audiencia ya ingresos publicitarios. Si nun hai alcuerdu, avanzó güei Xuan Xosé Mariño, responsable de Radio Sele, la emisora nun duldará n’urxir formalmente énte’l xuez la execución de la sentencia.

El fallu del Tribunal Superior de Xusticia d’Asturies anula dafechu la revocación de la llicencia concedida a Radio Sele pol Gobiernu en funciones de Sergio Marqués, qu’en 2001 anuló’l primer Executivu de Vicente Álvarez Areces en beneficiu d’otru de los candidatos nel concursu.

Radio Sele empezó a emitir en febreru de 1986 y dende entós convirtióse na única entidá radiofónica durable que mantuvo una programación estable dafechu en llingua asturiana. La retirada, hai agora cuatro años, de la llicencia concedida en 1999 truncó l’espoxigue de la emisora, con capacidá p’algamar a una audiencia potencial d’unes 800.000 persones.