Portada Festival de Lorient El Trasno fai en Lorient que “Axeitín” seya’l discu más premiáu d’Asturies

El Trasno fai en Lorient que “Axeitín” seya’l discu más premiáu d’Asturies

by redacción asturnews
Los percursionistes de la Banda El Trasno que ganaron el premiu Guinnes en Lorient

La Banda de Gaitas El Trasno de Cuaña llogró esti sábadu en Lorient que’l so discu de 2013 “Axeitín” pasare a ser el discu más premiáu d’esta década n’Asturies. La pieza culpable foi’l “Solo Number five” de Percusión que compuxera Javier Tejedor y que nel 2003 algamara’l segundu premiu del concursu de percusión de Lorient. A la segunda foi la bona.

Hai una década que les bandes asturianes entamaron a esmolecese más fondamente pola percusión, enfotaos en qu’esa seición representa davezu la metá de la visibilidá musical y espectacular d’una Banda de Gaites.  Y les bandes que dirixién los hermanos Tejedor yeren de les que más concencia teníen de la importancia de la percursión nel futuru de les bandes asturianes.

Cuando tuvieron en 2003 en Lorient, prepararon un sólu de percusión qu’interpretaron conxuntamente los percursionistes de les bandes Tabladar d’Avilés y La Raitana de Nava y Piloña. Yera’l “Solo Number five” que grabare El Trasno nel so discu de 2013 y que se remozaba pala ocasión con delles espectaculares interpretaciones que facíen ruxir l’internu de la instrumentación y que amosaben un perestrañu engranaxe de xilofón amañáu con tubos pa ufrir un espectáculu que sorprendió al xuráu pola so innovación y la so perfecha execución.

Cuando s’estreno la pieza en Lorient allá pol 2003 algamó un mui dignu segundu puestu, pero tuvieron que pasar otra media docena de Años, pa qu’otra collaboración ente los percusionistes de les bandes “Llariegu” y “Noega” dieran per primera vegada el campeonatu que patrocina Guinnes a la delegación Asturiana.

Y aportó 2015 con una banda maúra, formada ya ambiciosa, que perquería dexar afitada la calidá del so trabayu d’estos años depués de llograr el Premiu al Meyor Cantar en 2014 con otra pieza del mesmu discu.  El vienres 14 de marzu del 2014, los cuatro finalistes de la octava edición d’esi premiu del Principáu actuaron en directu na Gala d’entrega del VIII Premiu al Meyor Cantar, nel Teatru de Llaboral Ciudá de la Cultura (Xixón). Y depués d’oyer los cantares, un xuráu independiente escoyó al tema «Volviche» de La Banda El Trasno como meyor cantar del añu 2013.

El sábadu 15 en Lorient, toles vírxenes que se festexaben n’Asturies paecíen tar esperando que la braera tradición percusionista de los pueblos celtes del sur, de los ástures qu’enta dexen entever daqué del so vieyu matriarcáu, alloñara al Ñuberu con una campanada nel únicu premiu que se-y negaba a una única banda en Lorient.

Y les Xanes d’anguaño apaecieron nel momentu precisu: Yobana, Sofía, Andrea, Carolina, Cristina, Virginia y Bárbara. Y ficiéronlo col sofitu de Javi, Miguel y Juanjo, pa ser nesti Lorient 2015 a algamar un momentu d’emoción del que van tener muncha señaldá, pa tola so vida.

 

Tamién te podria gustar