Portada Fiestes El Topu Farpón convoca a los sos voluntarios pa San Mateo

El Topu Farpón convoca a los sos voluntarios pa San Mateo

by redacción asturnews
El chiringu del Topu Fartón nes fiestes de San Mateo amuesa en cartelos les sos reivindicaciones como la oficialidá

Les organizaciones que componen el Llar Solidariu , como XEGA, SOS Racismu Asturies y la Xunta pola Defensa de la Llingua Asturiana faen como cada añu un llamamientu pa que los sos simpatizantes collaboren na xera de desenvolver el chiringu Topu Fartón nes fiestes de San Mateo, que va abrise’l 11 de seitembre.

El Llar Solidariu ye un espaciu abiertu a tol mundu, plural, democráticu y autoxestionáu dende’l que se defenden valores d’igualdá, de solidaridá, de llibertá, de xusticia y de paz, que son tresversales a les organizaciones que formen parte d’elli.

Y con éses, como cada añu dende hai 32, los colectivos mentaos instalen demientres les fiestes de San Mateo, n’Uviéu, el yá míticu chiringu Topu Fartón.  Amás de los oxetivos de sensibilización social sobre les cuestiones peles que puxen este organizaciones, dende la oficialidá del asturianu al respetu a la diversidá afectivosexual y d’identidá de xéneru, ente otres munches, el Topu Fartón tien otra función que ye la d’algamar recursos financieros, de suma importancia pa la pervivencia de les asociaciones que componen el Llar Solidariu y de les actividaes que desenvuelven.

El trabayu voluntariu nel chiringu ye fundamental p’apurrir los recursos económicos necesarios pa sostener tola infraestructura del Llar Solidariu. Por mor d’ello, les organizaciones del Llar quieren facer alcordanza de qu’anguaño les fiestes empiecen el vienres 11 de setiembre y terminen el llunes 21. Y que, pa los que quieran apurrir la so collaboración, los preparativos empiecen el sábadu cinco, con una quedada na cai Gascona 12 d’Uviéu pa dir cargar tola estructura del chiringu nel camión a les 16:30 hores.

El montaxe empecipia’l domingu seis, a los nueve de la mañana na Plaza del Conceyu. Y del llunes 7 al vienres 11 hai que pasar pol chiringu, na midida de lo posible, p’asitiar el teyáu, los toldos, el suelu del almacén, llimpiar, pintar, hixienizar, poner l’agua, instalar l’equipu de música, decorar, colgar pancartes, banderes… Asitiar tol material (bebida, vasos, coses de la cocina). Tamién ye bien importante qu’haya muncha xente’l vienres 11 a los nueve de la mañana porque ye cuando lleguen tolos camiones colos pidíos.

El Topu Fartón va abrir al públicu’l vienres 11 tres la llectura del pregón (sobre les 20.00 hores) y hasta el llunes 21 dirán asocediéndose seis turno diarios.

Tamién te podria gustar