Portada Plástiques El Thyssen presenta una máquina pa ‘sentir’ l’arte

El Thyssen presenta una máquina pa ‘sentir’ l’arte

by redacción asturnews

Que los ciegos puedan ver les pintures, que los sordos escuchen les hestories de cada obra o que les persones con discapacidá intelectual entendan ensin dificultá dalguna son los oxetivos principales de les innovaciones d’accesibilidá al arte que’l Muséu Thyssen presentaba esta selmana en Madrid dientro d’un proyectu participaos por otros cinco museos europeos y financiáu pola Unión Europea.

La estrella ye un dispositivu de “relieve interactivu” que dexa al usuariu lleer al tactu les reproducciones d’un cuadru mientres l’aparatu va informándo (por voz, imaxe y testu) sobro cada unu de los personaxes, oxetos, elementos y detalles de la pieza que ta tocando.

Anque se concibiera especialmente pa los invidentes, esta máquina de sentir l’arte creada polos inxenieros y espertos del llamáu programa Arches va ponese a disposición de tol públicu. “Seique los neños más que naide pero tamién los mayores…, toos quixéramos tocar les obres d’arte que vemos nos museos”, señala la coordinadora del proyectu per parte del Muséu Thyssen, Felícitas Sisinni.

La ferramienta de relieve interactivu consta de trés elementos: una reproducción en 3D del cuadru de que se trate, una cámara y una pantalla con botones táctiles a los llaos. Como novedá más relevante al respective de inventos anteriores d’igual o asemeyada, el sistema identifica con precisión y en tiempu real caúna de les figures y componentes de les obres. Tamién inclúi filtros de color y de grises y opciones p’ampliar les descripciones o modular la so velocidá, ente otres posibilidaes.

Pel momento, los usuarios van poder ver, oyer y tocar d’esa manera seis grandes obres pictóriques; una per cada muséu integráu nel proyectu. Amás del Thyssen, que nesti apartáu apaez representáu con Habitación d’hotel , de Edward Hopper, el grupu Arches incorpora al Victoria and Albert Museum y la Wallace Collection de Londres, el Kunsthistorisches Museum de Viena, el Lázaro Galdiano de Madrid y el Belles Artes d’Asturies, n’Uviéu.

 

Tamién te podria gustar