El Thyssen lleva’l so arte al mundu virtual al traviés de ‘Animal Crossing’

Un videoxuegu de simulación social p’averar el so arte a los más nuevos. Esa ye la última iniciativa del Muséu Thyssen, que s’introduz na nueva entrega del popular ‘Animal Crossing’, un videoxuegu que dexa a los xugadores crear la so propia colección d’arte nuna isla.

El Thyssen n’Animal Crossing ye una iniciativa educativa qu’utiliza’l videoxuegu de Nintendo pa “construyir esperiencies dixitales dende l’arte”, señala un comunicáu del muséu. L’oxetivu del xuegu ye crear un nuevu muséu virtual dende’l qu’averar les colecciones del Thyssen a xugadores de too el mundu.

L’usuariu puede formar la so propia comunidá n’una isla erma y personalizala al so antoxu. Pa ello puede descargar y guardar, por aciu códigos QR, obres d’artistes como Caravaggio, Carpaccio, Murillo, Holbein, Rubens, Goya, Manet, Degas o Cézanne.

Les obres pueden incorporase a les sos isles y numberosos vídeos van ayudar a conocer meyor el muséu, los sos artistes y los sos cuadros. Los xugadores pueden compartir los sos cuadros preferíos col muséu vía Twitter en @EducaThyssen.