Portada Escéniques “El thriller pasional” de ‘La verbena del Palombu’ llega al Campoamor

“El thriller pasional” de ‘La verbena del Palombu’ llega al Campoamor

by redacción asturnews

‘La verbena del Palombu, pensión completa’  ye un  thriller pasional qu’acaba n’una fiesta, nun resort de Benidorm y que llega al teatru Campoamor esta fin de selmana, con sesiones los díes 9 y 10 y col artista asturianu Rodrigo Cuevas como sorpresa.

“Apostemos pol riesgu, desfiximonos del machismu que, en cierta midida, trescalaba’l guion orixinal y apostemos pola renovación d’una de les grandes obres del xéneru chicu”. Con estes palabres definía Maxi Rodríguez, el director d’escena, el segundu títulu del XXV Festival de Zarzuela, presentáu hai unos díes nel Teatru Campoamor, que va acoyer la so puesta n’escena esta fin de selmana, nos díes 9 y 10 d’esti mes.

El presidente de la Fundación Municipal de Cultura, el conceyal Roberto Sánchez Ramos, tamién tuvo na presentación xunta bona parte del elencu, conformáu por 140 persones y faló de dos feches: “1953-2017. El primer añu recuérdolu porque ye’l que nací y l’añu nel que s’estrenó, nel Campoamor, la primer zarzuela, ‘El gaiteru de Xixón’. El segundu, ye’l del estrenu, de la mano de Maxi Rodríguez, de ‘Maharajá’. Agora volvemos con él y el so equipu a una nueva producción propia: ‘La verbena del Palombu, pensión completa´ y yá anuncio que pal añu próximu tamos trabayando nun nuevu estrenu porque la nuesa intención ye siguir trabayando por esti xéneru chicu y la so renovación”.

El director artísticu de la Fundación Municipal de Cultura, Cosme Marina, incidió na necesidá de la zarzuela “en poder anovase. Qu’esta obra nun pudiera ser coproducida por dellos teatros fala de la situación que travesamos”. Al respective de les característiques de ‘La verbena del Palombu, pensión completa’, Marina destacó “el gran nivel vocal col que se defende nesta ocasión”. Sobro este mesmu asuntu, el director musical, José Marina Moreno, estimó’l fechu de volver tar equí, n’Uviéu, nel Campoamor, y redundó “na importancia de lo que dende esta ciudá y esta comunidá ta faciéndose pol xéneru”.

Francisco González Álvarez-Buylla, presidente de la orquesta Uviéu Filarmonía y del coru Capiya Polifónica Ciudá d’Uviéu, felicitó a tolos presentes pol so gran trabayu y destacó que “na midida na que nos toca a nós ponemos tola carne n’asador por que esta temporada sía la segunda más importante del mundu”.

Pa rematar la presentación y a entrugues de los medios, l’artista Rodrigo Cueves, optó por nun desvelar el so papel na obra magar esclarió que “va ser una sorpresa”.

Tamién te podria gustar