El Teatru Prendes de Candás estrena “Palabres” del Grupu San Felix los díes 8 y 9 de payares

El Teatru Prendes de Candás (Carreño) acueye la estrena del espectáculu escénicu “Palabres”, los díes 8 y 9 de payares pol Grupu de Baille “San Félix” de Candás que presenta la obra basada nuna idega orixinal del escritor Xurde Fernández, en coproducción col propiuTeatru Prendes, . La propuesta tien un nidiu calter multidisciplinar y axunta música, baille tradicional, lliteratura y arte audiovisual nun espectáculu únicu del que ya amosó avances el grupu n’imporantes actuaciones como les que lu llevaron a Lorient.

PALABRES ye un espectáculu del Grupu de Baille “San Félix” de Candás que, en coproducción col Teatru Prendes de Candás, desendolca una idea orixinal del escritor Xurde Fernández (Candás,1975). Nella, la música, la lliteratura, la danza tradicional y l’arte audiovisual conviven nun mesmu espaciu escénicu, xenerando asina un discursu artísticu nuevu que s’articula alredor d’un doble oxetivu: el respetu a la tradición propia; y la anovación y creación de víes d’accesu afayadices p’atraer a nuevos públicos interesaos en reflexonar sobre’l propiu conceptu de “tradición”.

Pa ello, l’espectáculu PALABRES cuenta con música en directu, de nueva creación, compuesta pola cantante y contrabaxista Mapi Quintana y el curdionista Marcos García. Tarán acompañaos n’escena pol guitarrista Rubén Bada, el multipremiáu percusionista Fernando Arias y el trompetista holandés Thomas Welvaadt.

La música arropará a los escritores Aurelio García Ovies, Xandru Fernández, Pablo Texón, Concha Quintana, Elías Veiga y Xosé Miguel Suárez que lleerán fragmentos de la so obra en directo, iguando’l discursu sobre’l que s’articula l’argumentu de la obra.

Les empreses de producción audiovisual Señor Paraguas y Proima-Zebrastur axunten al espectáculu un trabayu sofitáu n’elementos de lluces y solombres, clips de videu, pantayes que modifiquen les percepciones del públicu y xuegos audiovisuales que completen la propuesta de PALABRES.

Too ello cola misión d’ufiertar nuevos puntos de vista dende los qu’analizar la realidá llingüística asturiana d’anguañu.