El teatru Palacio Valdés estrena la nueva producción de Maxi Rodríguez, “Niue under the coconuts”

El teatru Palacio Valdés estrena la nueva producción de Maxi Rodríguez, “Niue under the coconuts”
20 avientu 10:05 2018 Imprimir

El teatru Palacio Valdés estrena la nueva producción de Maxi Rodríguez, “Niue under the coconuts”. Alberto Rodríguez y Carlos Mesa protagonicen la surrealista hestoria de dos náufragos n’una isla erma, dientro de la sección Fechu n’Asturies de escenAvilés.

La sección Fechu n’Asturies de escenAvilés amuésase añu tres d’añu como’l llugar indicáu onde comprobar la vixencia del teatru asturianu y Maxi Rodríguez ye unu de los más activos y ventureros autores de la comunidá. Esta vegada escoyó el Teatru Palacio Valdés pa estrenar la so nueva obra, “Niue under the coconuts”, la surrealista hestoria de dos náufragos, coles mesmes Alberto Rodríguez y Carlos Mesa, que podrá vese esti xueves, 20 d’avientu, a les 20.15 hores.

Les entraes, a un preciu de 10 euros y ensin numberar, pueden adquirise nes canales habituales, les taquilles de la Casa de Cultura, la del Teatru Palacio Valdés esti mesmu día de la representación, a les 19.15 hores, y na web https://entraes.liberbank.es/palaciovaldes.

La obra foi presentada esta selmana por Yolanda Alonso, conceyala de Cultura d’Avilés, nel Foyer del Teatru Palacio Valdés. Al pie de ella, l’autor y director, Maxi Rodríguez, la productora, Marga Llanu, y los dos actores protagonistes, Alberto Rodríguez y Carlos Mesa.

Dos personaxes naufraguen y recalen nuna isla erma. Unu interpretalu Alberto Rodríguez; l’otru, Carlos Mesa, dos actores en forma, dos de les cares más conocíes de la escena asturiana, qu’esti 2018 yá compartieron función nes tables del Palaciu Valdés con “X la to culpa”, y habituales tamién de la pequena pantalla en distintos espacios de la TPA, como “Universo Rodríguez”.

Sobro l’escenariu, dándose retruque, los náufragos van lluchar pola supervivencia, en añoranza pola vida que dexaron pa tras.  La obra, l’autor, los actores, beben del teatru del absurdu, de Ionesco, de Samuel Beckett, pero tamién de los grandes del humor, como los Monty Python, o los nuesos Tip y Coll. “Surrealismu sanador pa sobrollevar una vida rara que, día ente día, pásanos percima colos sos fiascos, los sos señuelos y l’esmolecedora posverdad que marca, ensin piedá, el ritmu de la nuesa realidá virtual”, en palabres de Maxi Rodríguez.

  Categories: