El Teatru Palacio Valdés d’Avilés acueye esti vienres l’estrenu nacional de “El Pack”

El Teatru Palacio Valdés d’Avilés acueye esti vienres l’estrenu nacional de “El Pack”
26 febreru 08:26 2016 Imprimir

Esti vienres, 26 de febreru, a les 20:15 hores, el Teatru Palacio Valdés d’Avilés va acoyer l’estrenu nacional de la obra “El Pack”, escrita y empobinada por Áurea Martínez Fresnu, y enmarcada dientro de la sección “Teatru 2016″ del ciclu xineru-marzu de escenAvilés.

“El Pack” ye una pieza qu’utiliza distintos recursos dramáticos y audiovisuales, interpretada por nueve actores pero con namái una actriz n’escena: Marta Solaz. La obra entemez escenografía, llume y música coles nueves tecnoloxíes dixitales que interactúan cola fuerza dramático de la protagonista.

En “El Pack”, la tecnoloxía dixital nun ye namái un elementu escenográficu, sinón un personaxe más de la obra, indisociable de la temática que plantega: derivar de les relaciones humanes na dómina de les redes interconectaes. Marta Solaz da vida a Thais, una persona qu’esfruta de la so relación col mundu hasta’l día en qu’afaya que la virtualidad pasólu percima y que toos somos personaxes representando papeles ante les múltiples pantalles que constrúin la nuesa vida. Al traviés d’elles, interactúa con otros personaxes interpretaos por Manuela Velles, Ana Rayo, Sergio Peris-Mencheta, Laura Gómez-La Cueva, Félix Gómez, María José Moreno, Jorge Usón y María Forqué.

Danza y música son dos aspeutos curiaos con mimu en “El Pack”. La coreografía ye obra de Chevi Muraday, director de la compañía Losdedae y Premiu Nacional de Danza en 2006. Pela so parte, la compositora zaragozana Carmen París firma les pieces musicales d’esta obra qu’arrinca n’Avilés la so xira polos escenarios del territoriu nacional.

  Categories: