El Teatru Palacio Valdés celebra’l so centenariu con una gala operística

El Teatru Palacio Valdés celebra’l so centenariu con una gala operística, con invitaciones escoses nes sos dos representaciones. Por cuenta de la celebración del primer Centenariu del Teatru Palacio Valdés y dientro de la programación cultural de San Agustín pal mes d’agostu, esti domingu 9 y güei llunes 10, a les 22:30 hores énte la fachada del coliséu avilesín tien  llugar una gala onde la música va compaxinar colos xuegos de lluces.

Los grandes protagonistes son 4 solistes (les sopranos Maite del Cal y Ana Peñáu; el barítonu Juan Salvador Trupia y el tenor Gaspar Braña) toos ellos miembros del Coru de la Ópera d’Uviéu, xuntu con un pianista (Marcos Suárez) encargáu del acompañamientu musical y xuna voz narrada pol avilesín Celestino Varela, director de la Ópera d’Uviéu. Tou ello so la dirección del tamién avilesín Raúl Vázquez, autor del espectáculu.

El conciertu, en formatu de gala llírica semi-escenificada, percorre la hestoria del teatru dende l’allugamientu de la so primer piedra hasta la dómina actual, al traviés de los sos seis personaxes (un pianista, cuatro cantantes y xuna voz en off).

Los cuatro personaxes principales, que nun primer momentu van presentase realizando trabayos de restauración del edificiu, van afayar la hestoria del Teatru Palacio Valdés al traviés d’una cápsula del tiempu escondida nos sos suétanos. Esa cápsula va llevar nel so interior documentos colos que’l públicu va dir conociendo, en formatu de sainete, la hestoria del teatru, enllazando la trama con cada unu de los númberos musicales escoyíos pa la ocasión.

Como fechu destacable de la gala cabo mentar la recuperación d’unu de los númberos musicales de la opereta “L’As” del compositor Rafael Caleya, obra escoyida pa la función inaugural del teatru’l 10 d’agostu de 1920, según xuna de les romances de la zarzuela “La Carrera d’América”, del compositor avilesín Rubén Díez, con llibretu del historiador Juan Carlos de la Madrid y estrenada nel Palaciu Valdés en 2007. Al atopase’l teatru zarráu por causa de la crisis sanitaria actual, l’acción va desenvolvese na fachada del mesmu, convirtiéndose ésti nun personaxe más sobro’l que van xugar tanto elementos escenográficos como imaxes proxectaes.

El públicu va permanecer sentáu nos asientos dispuestos en callar Palacio Valdés, garantizándose en tou momentu’l cumplimientu de les midíes sanitaries contra’l COVID-19: cortil acutada, distancia ente sielles, usu obligatoriu de mázcaros y de xel hidroalcohólico, toma de temperatura, rexistru d’asistentes, control d’accesos, etc.

Más información y programa