El teatru Filarmónica clamó pola oficialidá

El pasáu vienres día 7 d’abril el teatru Filarmónica d’Uviéu enllenóse de xente que, siguiendo la convocatoria del Conceyu Abiertu pola Oficialidá, clamaron pola necesidá de que l’estatutu asturianu recueya la oficialidá pa la llingua asturiana na so prósima reforma. Representantes de los más de 150 colectivos que formen parte d’esta organización cívica xubieron al escenariu pa desixir el reconocimientu de los derechos llingüísticos de los falantes d’asturianu, llevando a los tribunales, si ficiere falta, cualquier casu de marxinación nesi sen.

Debaxo d’una gran pancarta na que se pidía “Na reforma del Estatutu, l’asturianu llingua oficial”, los miembros del Conceyu Abiertu pola Oficialidá lleeron un manifiestu nel que s’esixía’l reconocimientu oficial del asturianu per parte del ordenamientu xurídicu, porque ésta “ye la única ferramienta llegal” que puede garantizar d’una manera efectiva’l respetu hacia esti derechu que los asturianos lleven clamando más de trenta años.

Ente les actuaciones d’Anabel Santiago, Toli Morilla y Felpeyu, representantes de los más de 150 colectivos de maestros, músicos, escritores, grupos políticos, sociales y culturales que formen parte del CAO xubieron al escenariu del teatru Filarmónica, faciendo d’esta manera visible la demanda de gran parte de los asturianos que ven “agraviaos” los sos derechos llingüísticos per parte del Gobiernu asturianu, denunciando asi l’actitú “inxusta” de les fuerces polítiques mayoritaries que de contino vienen negando’l reconocimientu llegal de la llingua y de los sos falantes.

El gaiteru Xuacu Amieva foi l’encargáu de zarrar l’actu colos sones del “Asturies, patria querida”, que foron siguíos por tola xente que’l vienres de tarde enllenaba’l teatru Filarmónica d’Uviéu. Mentestanto los convocantes emplazaben a la sociedá asturiana a volver a salir a la cai’l prósimu 5 mayu, día nel que se cellebra’l tradicional Día de les Lletres Asturianes.