Portada Conceyos El Setiembre Mitolóxicu de Samartín viaxa a otros conceyos

El Setiembre Mitolóxicu de Samartín viaxa a otros conceyos

by redacción asturnews
Mocedá visitando la esposición del Setiembre mitolóxicu

Les actividaes dedicaes a la mitoloxía asturiana a lo llargo del mes de setiembre terminen en Samartín del Rei Aurelio pero viaxen n’ochobre a Llangréu y Grau.

A lo llargo del mes los mitos convirtiéronse nos protagonistes de l’actividá cultural del conceyu de Samartín del Rei Aurelio al traviés de la esposición de dibuxos del ilustrador llangreanu Javier Iván Villa Vilchez, que se pudo visitar na FEMEX y na Casona del Bravial de Blimea, onde tamién se contó cola intervención en delles xornaes del etnógrafu y escritor Alberto Álvarez Peña, qu’ufiertó una charra sobre esta temática’l pasáu 23 de setiembre.

Les actividaes foron siguíes por escolinos del conceyu  y xubieronse materiales didáuticos a les páxines de facebook y twitter de la Oficina de Normalización Llingüística de Samartín.  Estos materiales puen descargase de baldre, y recomiéndense especialmente pal personal docente.

Anque les actividaes terminen en Samartín van siguir n’otros llugares, durante’l mes d’ochobre la esposición va poder vese nel IES Jerónimo González de Sama, pa viaxar en payares a Grau, onde se va instalar nel IES César Rodríguez y na Casa la Cultura del mesmu conceyu. Nestos momentos tán concretándose feches con otros centros. Les persones o instituciones interesaes n’abellugar la esposición y siguir sacando provechu de la mesma puen ponese en contautu cola Oficina de Normalización Llingüística de Samartín del Rei Aurelio nel teléfonu 985656110 o a traviés del so corréu electrónicu.

Tamién te podria gustar