El serviciu pala declaración del IRPF nun atiende llamaes nes llingües cooficiales

06 agostu 09:42 2018 Imprimir

La nueva axudicataria del serviciu de cita previa telefónica de l’Axencia Tributaria, Konecta BTO, nun ta atendiendo llamaes en catalán, valencianu nin gallegu, incumpliendo’l pliegu de condiciones del contratu que tien col Ministeriu, torgando un de los drechos llingüísticos que paecíen más afitaos n’España.

El serviciu axudicose’l pasáu 4 de xunetu por 3.682.200 euros, más impuestos, ya incluyía tamién  subrogar a los cien emplegaos de l’anterior subcontrata, Sifu, lo que nun ta faciendo y según los afectaos fraya la nueva Llei de Contratos Públicos al tratase de trabayadores con una discapacidá reconocida. El conflictu ta yá nos tribunales

El problema del emplegu de les llingües cooficiales nun ye a entendese, porque un menú automáticu dexaba a los contribuyentes qu’utilizaben esti serviciu escoyer hasta agora ser atendíos neses llingües cooficiales. Esta selmana esa opción dexó de ser posible, magar que’l pliegu del contratu que s’axudicó Konecta establecía que “les llamaes procedentes de Catalunya, Comunidad Valenciana, Galicia y Illes Balears tendrán d’atendese, a voluntá del contribuyente, en castellán o na llingua cooficial propia de cada Comunidá Autónoma”.

El vienres entamaron les escuses pa nun atender neses llingües que sigún los usuarios yeren variopintas. En Catalunya, tres una segunda llamada denunciaben qu’un teleoperador de Konecta indicaba pasaes les 14 hores que la persona qu’atendía en catalán yá colara. L’atención nesa llingua, dicía, taría disponible yá’l llunes. Una esplicación similar dieron en Galicia, ente que en Valencia, la respuesta foi: “Nun tenemos esa posibilidá”. Esti diariu unvió’l vienres un corréu electrónicu a Konecta para conocer la so versión sobro esti asuntu, ensin llograr respuesta.

Fontes próximes a l’Alministración reconocen que la empresa nun ta cumpliendo esi requisitu del pliegu y confíen en qu’esta situación soluciónese llueu, al igual que la del centenar de trabayadores de l’anterior subcontrata (Sifu) que se quedaron ensin emplegu.

Loading Facebook Comments ...