Portada Convocatories El Seminariu “Oficialidá” amuesa’l el camín constitucional de futuru pal asturianu

El Seminariu “Oficialidá” amuesa’l el camín constitucional de futuru pal asturianu

by redacción asturnews

Esti vienres entama na Universidá d’Uvieu’l Entama’l Seminariu “Oficialidá: el camín constitucional de futuru pal asturianu” organizáu pola ONG Iniciativa pol Asturianu y que va tener, ente toles ponencies ya intervenciones, a un bon garapiellu d’espertos de prestixu internacional, reconocíos, y bien conocederes de la realidá asturiana y española.

Ente esos espertos van tar l’escritor Xuan Bello, la investigadora Isabel Hevia o’l xurista y lletráu del Tribunal Constitucional José Manuel Pérez Fernández. Cabe destacar que los actos va inauguralos el rector de la Universidá d’Uviéu, Santiago García Granda, que yá amosó nos meses pasaos l’apoyu de la Universidá a la oficialidá.

El Seminariu va entamar cola acreditación de los asistentes a les cuatro la tarde nel Aula Magna de la Uniersidá y la inauguración va ser a les 4 y media pol Rector de la Universidá d’Uviéu, Santiago García Granda, y el presidente d’Iniciativa pol Asturiano, Inaciu  Galán.

A les cinco, Xosé Antón García Riaño, presidente de l’Academia de la Llingua Asturiana, va ufrir un marxu xeneral pala aplicación de la oficialidá y a les 18,30 va estrenase’l documental “La vida ensin oficialidá. Les consecuencies de la falta de drechos llingüísticos n’Asturies”.

A les siete la tarde, la profesora de ciencies de la educación Isabel Hevia Artime va falar de “les ventayes de la presencia del asturianu nel sistema educativu” y darréu va pesllase la primer xornada del seminariu cola conferencia del Lletráu del Tribunal Constitucional y profesor de derechu alministrativu José Manuel Pérez Fernández sobre “Constitución y llingües: Oficialida, conteníu y desendolque”.

El sábadu entama la segunda xornada del seminariu a les 10 de la mañana cola participación del Caderalgu de Ciencia Política de la Universidá del País Vascu, Francisco José Llera Ramo, que va flar de “L’apoyu social al asturianu” ufriendo los datos del III Estudiu Sociollingüísticu d’Asturies”. Tres de Llera Ramo, van intervenir representantes de conceyos onde hai modalidaes d’oficialidá que se desarrollen con normalidá pa cuntar la so esperiencia.

A les 12 reanudaráse’l Seminariu cola intervención del profesor d’Economía Xosé Alba Alonso que falará de los “Aspectos económicos de la oficialidá: nin tantu coste nin namás coste” y tres d’elli falará l’escritor Xuan Bello sobre “La oficialidá y el desarrollu cultural d’Asturies”.

Y pa finar, celebrarase una mesa redonda embaxo’l títulu “¿Qué modelu d’oficialidá precisa Asturies?” na que van intervenir representantes de los partíos presentes na Xunta Xeneral que lleven la oficialidá nel so programa.

Les xornaes que van ser el 2 y 3 de marzu van ser abiertes al públicu anque se recomienda inscribise. Quien quiera cuntar con un diploma de reconocmientu habrá facer un pagu de diez euros nel momentu de facer la inscripción, na páxina web d’Iniciativa pol Asturianu. Amás, como pieslle del seminariu, el sábadu 3 dende les 14:30 hores va haber una espicha na sidrería La Pumarada d’Uviéu (C/ Gascona, 8), a la que puede pueden apuntase los asistentes por 25 euros.

El seminariu va tener llugar nel Aula Magna del Edificiu Hestóricu de la Universidá d’Uviéu, y pue apuntase quien lo desee, calcando ya inscribiéndose nel siguiente enllaz: https://goo.gl/forms/1douboXBvbQNhAUE2

Tamién te podria gustar