El Seminariu “Oficalidá” entama nel Aula Magna col pidimientu de cumplir la Constitución

Cumplir pa cola Constitución. Esti foi’l pidimientu cimeru que s’escuchó esti vienres nel entamu na Universidá d’Uvieu del Seminariu “Oficialidá: el camín constitucional de futuru pal asturianu” organizáu pola ONG Iniciativa pol Asturianu. El seminariu sigue esti sábadu a lo llargo la mañana.

L’espíritu qu’afaló en tou momentu les intervenciones recoyíes nesta primer xornada del seminariu resumíalu perbién el Rector, Santiago García Granda, na so intervención inaugural al falar dafechu n’asturianu “esmolecimientu pol nuestru idioma ye tamién espresar l’esmolecimientu pol futuru d’Asturies y la so identidá”. Santiago García Granda dexó bien clara una postura mayoritaria dende va tiempu na sociedá civil asturiana y que solo precisa d’un leve emburrión al sable políticu para cristalizar na allampada reconocencia y equiparación a les demás llingües de la península que supon la oficialidá que manda la constitución: “ye’l nuestru deber propiciar alcuentros como esti, inspiraos amás por una necesidá de cambiu tranquilu, sensatu, aglutinador y tamién desmitificador de prexuicios y conciliador de postures. Solo nel respetu de les opiniones y los derechos de toos podemos falar de democracia”.

El presidente de l’Academia de la Llingua, Xosé Antón González Riañu, reafitó’l pidimientu xeneral que lleva realizando la sociedá civil asturiana dende va años centrada en que s’aplique la Constitución al ámbitu llingüísticu y la profesora de Ciencies de la Educación de la Universidá d’Uviéu Isabel Hevia refirió la importancia que l’aprendizaxe de la llingua familiar supon para la cohesión social y económico d’un país.

La primer xornada del Seminariu entamáu por Iniciativa pol Asturianu pesllola’l lletráu del Tribunal Constitucional y profesor de Derechu Alministrativu de la Universidá d’Uviéu, José Manuel Pérez. La so ponencia desplicó’l marcu llegal de les distintes llingües de la península a la lluz de lo dispuesto na doctrina del Tribunal Constitucional y nel casu del asturianu punxo en cuestión víes como la Llei d’Usu porque “garanticen derechos, pero llindaos y enfréntense a ser cuestionaes polos tribunales”. Pa José Manuel Pérez, la única vía prevista pola Constitución ye la oficialidá, que sí garantiza esos derechos y que na so opinión “nun implica obligatoriedá d’usu a los ciudadanos: El tribunal ye claru: nun s’impon un deber individualizáu de conocencia, el deber aplicase a les alministraciones, que tienen d’ufrir los medios necesarios pala efectividá de talu derechu”. La so intervención remató con un ruegu: “que síamos capaces de llograr la reconocencia xurídica que les nueses llingües merecen, esto ye, la declaración d’oficialidá”.

Esti sábadu entama la segunda xornada del seminariu a les 10 de la mañana cola participación del Caderalgu de Ciencia Política de la Universidá del País Vascu, Francisco José Llera Ramo, que va flar de “L’apoyu social al asturianu” ufriendo los datos del III Estudiu Sociollingüísticu d’Asturies”. Tres de Llera Ramo, van intervenir representantes de conceyos onde hai modalidaes d’oficialidá que se desarrollen con normalidá pa cuntar la so esperiencia.

A les 12 reanúdase’l Seminariu cola intervención del profesor d’Economía Xosé Alba Alonso que falará de los “Aspectos económicos de la oficialidá: nin tantu coste nin namás coste” y tres d’elli falará l’escritor Xuan Bello sobre “La oficialidá y el desarrollu cultural d’Asturies”.

Y pa finar, celebrase una mesa redonda embaxo’l títulu “¿Qué modelu d’oficialidá precisa Asturies?” na que van intervenir representantes de los partíos presentes na Xunta Xeneral que lleven la oficialidá nel so programa.