El Seminariu d’Estudios Asturianos de Belenos va tratar sobre’l mal na Asturies tradicional

by redacción asturnews | noviembre 4, 2017 11:43 pm

La Puela d’Allande acueye, un añu más, el Seminariu d’Estudios Asturianos de la Fundación Belenos. Estes xornaes d’estudiu, que lleguen a la so XVIII edición, van desendolcáse los díes 18 y 19 de payares y nesta ocasión van tratar sobre’l mal na Asturies tradicional y los remedios colos que la xente trataba de face-y frente: “Escontra’l mal: remedios na sociedá tradicional asturiana”.

El sábadu 18 ye’l día acutáu pa la presentación de ponencies, coles intervenciones, n’horariu de mañana, de Cristobo de Milio Carrín (El conceutu del mal na sociedá tradicional asturiana), Ignacio Abella (La ñatura escontra’l mal) y Martín de Villar (Curandeiros, compostores y outros sanadores), y n’horariu de tarde de Xosé Antón Fernández “Ambás” y Ramsés Ilesies (El poder de la pallabra: rezos ensalmos y esconxuros) y Alberto Álvarez Peña (La enfermedá d’aniciu máxicu). Esti día rematará col tradicional filandón, fiesta asturiana de nueite con música del país nel Café Centro.

El domingu 19 va facese un pequeñu homaxe n’alcordanza d’Amparo López, A bruxa de Brañavara, nel centenariu del so nacimientu y pa ello intervendrá Fredo de Carbexe, cola charra Amparo López, el última nigromante…, y darréu proyeutaráse’l documental A bruxa de Brañavara, del que ye direutor Alberto Álvarez Peña, que xunto con Fredo y el públicu asistente participará nun alderique col que se va pesllar el Seminariu.

El preciu de la matrícula ye de 30 € y esiste la posibilidá d’agospiase en “La Nueva Allandesa” en réxime de pensión completa (dende la xinta’l sábadu a la xinta’l domingu, too incluyío dafechu); nesi casu la matrícula más l’agospiu son 90 € por persona.

P’apuntase y/o tener más información sobre’l XVIII Seminariu d’Estudios Asturianos pue contautase cola Fundación Belenos nos teléfonos 985244811 / 680114090 o nel corréu lletrónicu seminariubelenos@gmail.com.

Source URL: http://asturnews.com/el-seminariu-destudios-asturianos-de-belenos-va-tratar-sobrel-mal-na-asturies-tradicional/