Portada Cine El segundu Festival de Cine Asturianu va entamase n’Uviéu nel mes d’abril

El segundu Festival de Cine Asturianu va entamase n’Uviéu nel mes d’abril

by asturnet

El segundu Festival de Cine Asturianu fairáse l’añu prósimu n’Uviéu nel marcu del Teatru Filarmónica, los díes 10 y 11 d’Abril del 2006 siguiendo’l camín entamáu el pasáu 27 d’abril cuando se cellebró en Madrid el primer centenariu del cine asturianu. El Festival premia los meyores curtiometraxes asturianos y documentales amás de facer un homenaxe honoríficu a una figura cabezalera del cine astur.

Los premios d’esti festival, empobináu por un grupu d’asturianos residentes en Madrid a la cabeza de los cualos ta’l promotor cultural Xavier Vilareyo, consisten en dellos fruteros de cristal en recuerdu de la primer película asturiana “El robo de fruta” de 1905. El palmarés y los ganadores d’esti 2u Festival recibirán un homenaxe posterior nel Atenéu de Madrid. La Organización pretende que los ganadores puedan facer de xuraos na medida de lo posible nes ediciones posteriores. Esti añu premiaráse per primer vegada a los documentales que yá cunten con abonda tradición n’Asturies pero con mui pocu reconocimientu técnicu y artísticu. El Festival cuntará con una Gala d’Entamu onde se proyectarán tolos trabayos seleccionaos ante los xuraos y una Gala de Pieslle onde se fairán los homenaxes a los ganadores y a los premiaos, amás preténdese ser l’escaparate onde s’amuesen estrenos en primicia de los realizadores asturianos.

Tamién te podria gustar