El Salón de la Infancia enllena Llangréu d’actividaes

Esti vienres, 26 d’avientu, de 16 a 20 hores el Colexu José Bernardo va ufrir una riestra de Talleres qu’abren la fin de selmana más intensa d’actividaes nel Salón de la Infancia de Llangréu qu’entamar esta selmana coles vacaciones escolares. Diana de fieltru, globos d’arroz, el güevu-pitu, globopotatos, taller de xuegos del mundu, taller h.enna, muñecos articulaos, muñeques recortables, llibretes, pulseres de colores, chapatís indios, puertátiles, escalada, y tiru con arcu van ser les actividaes que van poer desendolcar los escolinos a lo llargo la tarde.

El cine lleva tola selmana siendo protagonista con delles proyeiciones en La Felguera y Sama qu’esti sábadu y domingu van trayer al Cine dos películes y los sos respeutivos talleres. esti sábadu de 17 a 20 hores proyectaráse nel Cine Felgueroso “Madagascar” ya impartiráse darréu un Taller de doblaxe y contestualización cultural. Y el domingu 28, de 17 a 20 hores, proyectaráse “Bichos” y fadráse darréu un Taller de creatividá ya anovación, cola collaboración de l’Asturias Film Commissión.

Les actividaes van seguir a lo llargo de toles vacaciones, finando enantes de la fiesta de Reis Magos. El sábadu 3 de xineru nel Muséu de la Siderurxa (MUSI) de 10 a 11:30 hores celebrarse un Taller embaxo’l títulu “los maestros, viaxes nel tiempu pela fábrica vieya (10-12 años)” y de 11:30 a 13:00 hores otros dos talleres “los alquimistes: trabayando con aceru (7 a 9 años)” y “los aprendices: la fábrica de colores (5 a 6 años)”.

Na Pinacoteca de Llangréu Eduardo Úrculo, del llunes 22 al 30 de xineru de 2009, podrá vese la exposición “Del flecha de plata al escalextric. Los meyores xuguetes la nuestra vida (esposición de más de doscientos xuguetes que formen parte la nuestra historia)” nel horariu de la pinacoteca, esto ye: de llunes a sábados de 10:30 a 13:30 y de 17:00 a 20:00 hores, y domingos y festivos de 11:30 a 14:30 hores, los martes pesllao.