El Réxime de Permanencia de la Universidá d’Uviéu lleva a los estudiantes a nueves propuestes

Esta mañana un grupu d’estudiantes de la Universidá d’Uviéu dirixieron una nueva protesta en contra del Réxime de Permanencia y la qu’atalanten ye la so principal responsable, Miriam Cueto. La reividicación tuvo llugar nel Campus del Milán onde s’inauguraben les Xornaes de Prevención de Riesgos Llaborales. Amás de Miriam Cueto, atopábase’l rector, Vicente Gotor, y otres personalidaes rellacionaes cola Universidá. Un vídiu de la protesta, difundíu pela mañana en YouTube desapaeció pela tarde de la rede.

Los estudiantes presentáronse nel actu con unos cartelos nos que podíen lleese mensaxes como: “Non al Reglamentu de Permanencia”, “Falten1099” o “Miriam Cueto culpable”. Momentos antes de rematar l’actu, la responsable d’universidaes abandonó la sala, ente berros el alumnáu uviéin: “Miriam Cueto dimisión”.

Gotor salió na so defensa alegando que dende la Universidá yá se ta intentando solucionar la problemática del Reglamentu de Permanencia. Sicasí, ella namái afirmó que’l resolvimientu d’esti conflictu depende del gobiernu, del cual ella forma parte y ye máxima responsable de política universitaria.

L’alumnáu aportunó en que nun resulta prestoso “recurrir a esti tipu de midíes, pero consideramos que les víes formales escosáronse tres 4 años d’intentu de diálogu y presentación de propuestes de cambéu a esti inxustu reglamentu, que yá espulsó a 1099 estudiantes de la Universidá d’Uviéu”.

Por eso dexaron bien a les clares que nun van dexar d’allegase a cuantos sitios faiga falta pa visibilizar esta problemática y poner nome y apellíos a los sos responsables.