El rector de la Universidá d’Uviéu, Ignacio Villaverde, va visitar l’Academia de la Llingua Asturiana esti xueves, nuna receición que celebra l’asoleyamientu de los seis tomos del Diccionariu Etimolóxicu de la Llingua Asturiana, de García Arias, coeditáu por dambes instituciones.
Ignacio Villaverde, rector de la Universidá d’Uviéu, va visitar l’Academia de la Llingua Asturiana esti xueves día 22 a les 12 del meudía. Ellí va recibilu’l so presidente, Xosé Antón González Riaño. Nel actu, de calter interinstitucional, l’Academia va presenta-y al rector les sos llinies de trabayu científicu y el resultáu de les principales investigaciones desarrollaes o en desarrollu, delles en collaboración cola propia Universidá.
Amás, ta previsto que la catedrática emérita Ana Cano esponga, nuna entrevista a cuatro, la importancia científica del Diccionariu Etimolóxicu de la Llingua Asturiana, del que ye autor el que fore catedráticu de la Universidá d’Uviéu, Xosé Lluis García Arias, que tamién va intervenir na receición. L’apaición del sestu tomu d’esta obra magna pon el ramu a un periodu de collaboración, especialmente intensu y granible, ente l’Academia y la Universidá. L’actu nun va tar abiertu al públicu xeneral pero sí a la prensa que confirme la so asistencia nel 985211837 o n’alla@academiadelallingua.com –con, a lo menos, 2 hores d’antelación– pa garantizar el cumplimientu de les midíes sanitaries.
