El rector inaugura la Selmana de la Ciencia

El rector inaugura la Selmana de la Ciencia
14 18:45 2016 Imprimir

El rector de la Universidá d’Uviéu, Santiago García Granda, inauguró esti llunes la Selmana de la Ciencia d’esti 2016 qu’inclúi más d’un centenar d’actividaes y charres en centros educativos asturianos.

La conferencia d’apertura corrió a cargu del profesor Marco de la Rasilla, que foi presentáu pola directora d’área d’Espardimientu y Promoción de la Investigación, Isabel Ruiz de la Peña.  Na so esposición, Marco de la Rasilla realizó un percorríu pola hestoria del neandertal y los afayos de la cueva del Sidrón.

García Granda confió en que mientres una selmana la Universidá conviertase nel escaparate de l’actividá científica. “Ye l’eventu más relevante de divulgación científica que s’entama n’Asturies”, aseguró. El rector avanzó dalgunes de les acciones más destacaes del programa, que va llegar a más de 7.000 estudiantes de primaria, secundaria y bachilleratu, y animó a participar nuna de les novedaes d’anguaño, el concursu ¡Faite un selfie con nós! sobre les actividaes de La Selmana de la Ciencia.

El Vicerrectoráu d’Investigación, al traviés de la Unidá de Cultural Científica y de la Innovación (UCC+i), programó en total más d’un centenar d’actividaes pa esta Selmana de la Ciencia, que tien como oxetivu averar la investigación a la población asturiana. La Universidá d’Uviéu participa nesta iniciativa dende hai 16 años, coincidiendo cola primer edición nacional, proponiendo acciones d’espardimientu qu’esti añu  traten d’averar la ciencia y la tecnoloxía al públicu polo xeneral y a los neños en particular, intentando llamar l’atención sobre los aspeutos de más interés y actualidá, con un enfoque entretenío y cercano.

La Selmana de la Ciencia cunta cola collaboración desinteresada de más de cien investigadores de la institución académica de los trés campus universitarios (Uviéu, Xixón y Mieres) y col financiamientu del Ministeriu d’Economía y Competitividá y la Fundación Española pa la Ciencia y la Tecnoloxía (FECYT).

  Categories:
Loading Facebook Comments ...