Portada Educación El rector defende que la EBAU pese más na nota final que’l Bachilleratu

El rector defende que la EBAU pese más na nota final que’l Bachilleratu

by redacción asturnews

El rector de la Universidá d’Uviéu, Santiago García Granda, tien una idea bien clara de qué ye lo qu’habría que camudar al respective de la Evaluación del Bachilleratu para l’Accesu a la Universidá, la EBAU, agora que tantu se fala d’ella y de la posibilidá de modificar. Na so opinión, el verdaderu cambéu necesariu ye da-y a esti exame más pesu na nota final que determina l’accesu a la institución académica.

Agora, esa nota vien afitada nun 60% pol espediente de Bachilleratu y nun 40% por esa prueba, tantu la xeneral como les específiques. Con éses, García Granda ye partidariu de «dar menos valor al espediente y más valor al exame, si realmente queremos que la prueba discrimine». Porque, al so xuiciu, la verdadera diferencia ente autonomíes nun se da na selectividá, sinón na formación previa y l’evaluación que los docentes faen de los alumnos.

Nes próximes selmanes, el Gobiernu va convocar una comisión o grupu de trabayu, na que los ministerios d’Educación y Universidaes, les comunidaes, rectores y estudiantes van aldericar posibles cambeos na EBAU. La cuestión ye que determinaos sectores solicitaron xuna selectividá única pa tol país qu’acabe coles posibles diferencies ente territorios. Mientres, otres munches voces, ente les que s’atopa’l Principáu, creen que solo fai falta correxir delles disfunciones».

Santiago García Granda ta nesi segundu grupu y dexa bien a les clares que se trata «casi d’una posición personal del rector» y matiza que los problemes danse tan solo nel accesu a graos con alta demanda, como Medicina y Fisioterapia, nes que los estudiantes pueden llegase a xugar l’accesu solu por unes décimes. Por eso, nun ve clara la necesidá de «remover tol sistema por dalguna pequenu disfunción. Ye meyor, na so opinión, intentar atayales al traviés del decretu añal que se publicar, premediar un pocu meyor delles coses pa tener una prueba que sía homologable en toles comunidaes y tamién de los estudiantes que faen el Bachiller fora d’España».

Daqué colo que’l máximu responsable de la institución académica asturiana nun ta d’alcuerdu. Pal rector lo más oxetivo pa evaluar y discriminar ye un exame como la EBAU. L’espediente anterior, non tanto. «Porque nes notes de Bachilleratu sí qu’hai xuna gran diversidá. Hai centros públicos, privaos, bien distintes situaciones, xuna diversidá terrible. Hai muncha más uniformidá na prueba, dientro d’una mesma comunidá y tamién ente autonomíes. Si les pruebes fueren bien distintes, sería un verdaderu escándalu, pero nun lo son». Pela contra, «los niveles educativos nun son uniformes dientro del territoriu nacional».

«El pesu de Bachilleratu ye bien alto», aportuna’l rector, «un 60%. Y ye ende onde puede producise xuna distorsión grande, de la que nun se fala demasiáu». O, siquier, no que nun se fai fincapié, porque asegura que el rectores sí alderiquen sobro ello.

 

Tamién te podria gustar