Portada Educación El rector de la Universidá d’Uviéu llamenta nun ser a trayer talentu internacional

El rector de la Universidá d’Uviéu llamenta nun ser a trayer talentu internacional

by redacción asturnews

El rector de la universidá d’Uviéu Santiago García Granda llamentó nun tener «fuerza llegal y económico» pa trayer talentu internacional nuna conferencia celebrada na Escuela de Comerciu na que tamién  fizo una crítica fonda del retayu n’investigación.

«Hubo un retayu del 36% n’investigación. Eso hai que camudalo». Nel so tonu sinceru de davezu’l rector de la Universidá d’Uviéu, Santiago García Granda, reivindicó esta selmana pasada la importancia que pa les universidaes tien la busca de nueves conocencies y la necesidá d’una base económica que dexe desenvolvelos: «Les universidaes tenemos que ser el primer espeyu nel que se mire la sociedá», dixo.

La reflesión fízola mientres una conferencia celebrada na Escuela de Comerciu na que García Granda repasó’l presente de la institución que dirixe dende 2016: «Creo qu’una de les virtúes que tuvimos ye la de saber afaenos a los tiempos», destacó al respective de un centru fundáu en 1608, la décima universidá d’España n’antigüedá, y qu’anguaño cunta con 21.713 estudiantes, 1.500 d’ellos procedentes d’otros países. La crecedera de la institución ye innegable. «En 2008 fundamos el primer grupu d’investigación. Anguaño tenemos 158 nos que s’arrexunten más de 1.800 investigadores ya investigadores que desenvuelven trabayos de referencia nacional», destacó.

Los númberos de la Universidá tán llueñe de ser malos, lo cual nun torga que siempres sían ameyorables, sobremanera si son vistos dende l’analís autocríticu del so rector. «Esmoleznos la empleabilidá. Tenemos el deber d’ufiertar a los estudiantes titulaciones que de verdá-yos dexen ser absorbíos pola redolada empresarial», reconoció. Otru de los aspeutos nos que la Universidá precisa crecer ye tocantes a la plantiya docente. «Tenemos graves problemes de renovación de plantiya. Tamos trabayando nello. Trabayar na Universidá nun puede ser daqué precariu», alvirtió García Granda, quien destacó l’esfuerzu de la institución por crear una pirámide d’edá docente «que los sos resultancies vamos ver n’unos años».

Nesti sentíu, el rector llamentó nun tener «fuerza llegal y económico abonda» p’atraer talentu internacional y asitialo nel senu universitariu. Dende’l puntu de vista d’alumnáu, la llave que desbloquiaría esta situación pasa pola apertura de la residencia d’estudiantes de Xixón. «Los vientos nun son bien favorables nesti sentíu, pero ye daqué clave p’atraer estudiantes estranxeros», aseveró.

Na investigación, unu de los aspeutos qu’ensin dulda van determinar el futuru de les universidaes, García Granda destacó la importancia de la Fundación Universidá d’Uviéu (FUO)  a la d’entainar una xestión similar a la de les grandes empreses: «Una de les coses que nos falta ye consiguir qu’haya más muyeres liderando investigaciones», asumió’l rector sobro un ente con un importe global suscritu de 5.543.125 millones. Sobre esta tema, nun dexó pasar la oportunidá d’avanzar novedaes: «Na próxima selmana vamos roblar una alianza coles universidaes d’un país bien importante», señaló ensin querer dar más detalles.

 

Tamién te podria gustar