Portada Comunicación El rector amuesa otra vuelta so firme compromisu cola normalización del asturianu

El rector amuesa otra vuelta so firme compromisu cola normalización del asturianu

by redacción asturnews

El rector de la Universidá d’Uviéu, Santiago García Granda, amosó esti xueves otra vuelta so compromisu cola normalización de la llingua asturiana nos dos actos institucionales colos que saludara l’entamu del cursu académicu: la inauguración del cursu pela mañana y la entrega de les certificaciones de la UABRA pela tarde.

L’actu d’apertura del cursu académicu 2018-2019 de la Universidá d’Uviéu celebrose esti xueves 13 de setiembre, a les 12 hores, na Biblioteca del Edificiu Históricu, presidíu pol rector, Santiago García Granda, y el presidente del Principáu, Javier Fernández, xunto a cásique doscientos doctores de la institución revestíos a la manera tradicional, nun nuevu record d’asistencia a esta cita anual. Y l’asturianu tuvo presente tantu nel discursu del rector, citando a Marcos del Torniello y poniendo puntu final a les sos pallabres n’asturianu como nes pancartes qu’amosaron los miembros del PAS de la Universidá y los doctorandos que se manifestaben al entamar l’actu pa pidir el cumplimientu de tolos alcuerdos llaborales.

El programa incluyía la llectura de la Memoria del pasáu cursu, al cargu de la secretaria xeneral de la Universidá, Eva María Corderu; la llección inaugural, que foi impartida por Juan Manuel Cueva Lovelle, catedráticu de Llinguaxes y Sistemes Informáticos, sol títulu “Internet de les coses ya Industria 4.0”; la intervención del Rector; y la intervención del presidente del Gobiernu del Principáu d’Asturies, Javier Fernández.

El discursu del rector foi reivindicativu, pero tamién dolce pa col presidente del Principáu al qu’afalagó na parte final pol sol calter siempre empobináu al diálogu. Poro nun dexó pasar el momentu pa pidir que nun haya amenorgamientu nos recursos: “La universidá nun puede dexase y el Principáu tendría de ser desaxeradamente sensible nesta tema, nengún amenorgamientu, retención, nin torga na execución del nuesu presupuestu”, dicía’l rector al tiempu que facía alcordanza de les esperances que da’l nuevu Gobiernu de Pedro Sánchez de que se produza un cambéu de paradigma y s’empreste darréu mayor atención a la investigación, reconociendo al tiempu’l papel de les universidaes públiques españoles: “Ye necesari0 que se dedique un esfuerzu inversor arrogante pa recuperar el retrasu que la crisis económica ta produciendo nel sistema universitariu español”.

Nel discursu, Santiago García Granda fizo un llamamientu por que’l Conseyu Social adopte una actitú  proactiva na dinamización ya implicación social del empresariáu nel desenvolvimientu estratéxicu de la universidá y reclamó una mayor implicación de la Universidá na definición y el desenvolvimientu del nuevu Plan de Ciencia, Tecnoloxía ya Innovación, pidiendo meyor coordinación ente los sos responsables y la Dirección Xeneral d’Universidaes ya Investigación.

A lo postrero, García Granda fizo pública la so reconocencia al llabor desenvueltu pol presidente del Gobiernu rexonal, Javier Fernández, y aprovechó la so intervención pa estima-y el so “talante, trabayu y compromisu” per Asturies, que nun discursu dafechamente políticu’l presidente malpenes contestó agradecíu a lo postrero. Javier Fernández prefirió facer un discursu antinacionalista nel qu’enalteció l’orixe del Reinu d’España entemeciéndolu col mitu de Cuadonga y “reñir” a los académicos ya intelectuales por alcontrase na zona de confort que na so opinión ye’l trabayu d’investigación en llugar d’opinar y acallar los glayíos de los tertulianos que falen ensin xacíu nos foros públicos.

 

Tamién te podria gustar