El Rector abre con un poema de Berta Piñán y un mensaxe d’optimismu’l nuevu cursu

El Rector abre con un poema de Berta Piñán y un mensaxe d’optimismu’l nuevu cursu
09 setiembre 18:51 2021 Imprimir

Ignacio Villaverde, rector de la Universidá d’Uviéu, unvió un mensaxe optimista al empiezu del cursu con un poema de Berta Piñán n’asturianu, el d’una universidá que mira al futuru ensin escaecer los esfuerzos y sacrificios demientres la pandemia na ceremonia d’apertura del cursu académicu 2021-2022 que se celebró esti mediudía nel Paraninfu del Edificiu Históricu.

El rector, que tuvo palabres d’agradecimientu pa tola comunidá universitaria, esbozó un futuru “con esperanza ya ilusión”. con un discursu nel que punxo enrriba la mesa les principales llínees d’actuación d’un tiempu nuevu qu’empieza cola torna a la presencialidá na universidá.

Ignacio Villaverde asumió como unu de los sos principales retos la implantación de l’alministración dixital que marque’l camín de la necesaria desburocratización de la institución académica y detúvose na necesidá de rematar la estructura de los campus y clarificar la ufierta de titulaciones de la universidá asturiana.

Nesti contestu, Villaverde mentó los nuevos presupuestos y la nueva relación de puestos de trabayu (RPT) como dos ferramientes fundamentales na consecución d’unos oxetivos que tienen de fuxir de la busca d’intereses particulares y apostar pol bien común y qu’allugó nel cursu que bien cuando camienta tenelos algamaos. El rector confió en que, nesta ocasión, a diferencia d’en crisis precedentes, la universidá reciba los fondos necesarios pa trabayar en beneficiu de la sociedá nel so conxuntu.

Pa finar, el Rector pidió “construyir ente toos una nueva universidad, una nueva casa universitaria,
sofitada dafechu no meyor de la so tradición, pero consciente de la nueva era que-y toca lliderar”. Y fízolo colos nomaos versos de Berta Piñán: “Llevantar una casa que seya como / un árbol, como Dafne crecer peles / sos rames, sentir les estaciones, la fueya / nueva depués de la ivernera, les frutes primeres / del veranu. Una casa que seya como un árbol, / qu’aguante los rellampos, qu’escample / la pedrisca, qu’espante lloñe la ventolera xélida / del tiempu”.

El rector peslló d’esta miente un actu d’apertura del cursu académicu nel que-y precedió nel usu de la palabra Borja Sánchez, conseyeru de Ciencia, Innovación y Universidá del Gobiernu d’Asturies, que sustituyó al presidente del Principáu, y que fizo referencia a la negociación del próximu contratu-programa qu’anguaño axusta’l Principáu cola institución académica y que va marcar el financiamientu de los próximos años.

  Categories:
Loading Facebook Comments ...