El recital Galardonaos pon música a 23 obres de poetes distinguíos colos Premios Príncipe y Princesa d’Asturies

El recital Galardonaos pon música a 23 obres de poetes distinguíos colos Premios Príncipe y Princesa d’Asturies
19 marzu 15:56 2021 Imprimir

La collaboración ente la Fundación Municipal de Cultura y l’Asociación Cultural La Serrana fixo posible la organización del recital Galardonaos, impulsáu pol colectivu “La Caravana del Versu”. L’auditoriu de la Casa de Cultura va ser l’escenariu qu’acueya esti eventu a partir de les 19:30 hores d’esti vienres 19, conmemorativu del Día Internacional de la Poesía, que se celebra’l domingu.

La conceyala de Cultura, Yolanda Alonso; la secretaria de l’Asociación Cultural La Serrana, Marta Elena Díaz, y l’integrante de La Caravana del Versu, Joaquín de la Buelga, presentaron esti eventu que pretende rindir homenaxe a los y les poetes que fueron estremaos col Premiu Príncipe y Princesa d’Asturies de les Lletres desque en 1981 empezaren a otorgase.

Na so comparecencia telemática énte los medios, Alonso aprovechó p’anunciar que l’apocayá finada escritora y poeta avilesina Marian Suárez, va ser recordada coincidiendo con esti Día Internacional, cola edición d’un marcapáginas que va reproducir unu de los sos poemes.  Tamién recordó l’adhesión del Plenu municipal del pasáu mes de febreru a la iniciativa pa declarar Asturies Capital Mundial de la Poesía.

Nel conciertu de güei vienres podrá escuchase una selección de 23 poemes de 11 autores: Anne Carson. Pablo García Baena, Ángel González ,José Ángel Valente, Claudio Rodríguez, Carmen Martín Gaite, Carlos Bousoño, Álvaro Mutis ,Paul Auster Leonard Cohen y Adam Zagajewski. D’estos 23 poemes, 11 van ser fechos cantar pol músicu Rodrigo Alperi,  ente que’l recitáu y declamación de los otros 12 va correr al cargu de Joaquín de la Buelga.

L’accesu a esti espectáculu ye llibre presentando invitación. Puedieron llograse na terraza del Hotel 40Nuedos, n’horariu de 11 a 13:30 hores. Les persones asistentes van ser agasayaes con un llibretu que contien tolos poemes recitaos y cantaos nel conciertu. Tamién podrá vese al traviés de la canal de YouTube de l’Asociación Cultural La Serrana:

https://www.youtube.com/channel/UCGLTOc8lA3DmUk3Rx_GR1Uw.

 

  Categories: