Portada Conceyos El Quixote nel cómic, protagonista de les VII Xornaes Cervantines d’Avilés

El Quixote nel cómic, protagonista de les VII Xornaes Cervantines d’Avilés

by redacción asturnews

Les Xornaes Cervantines d’Avilés algamen la so VII edición, y nesta ocasión, van trazar una repasada a les incursiones de Don Quixote nel cómic, del sieglu XIX al XXI, al traviés d’una esposición entamada pola Universidá de Castiella-La Mancha que podrá vese dende’l 26 d’ochobre hasta’l 9 d’avientu nel Palaciu de Valdecarzana.

L’amuesa “El Quixote nel cómic”, comisariada por Esther Almarcha, directora del Centru d’Estudios de Castiella-La Mancha (CECLM), realizase nel marcu del proxecto Iconografía popular del Quixote desenvueltu por el mesmu CECLM perteneciente a la Universidá de Castiella-La Mancha (UCLM), y supon un percorríu del Pernomáu fidalgu pel camín del cómic en distintos países y dómines; un planteamientu espositivu orixinal en cuanto al tratamientu del personaxe cervantín treslladáu a la viñeta.

Afigurada en 30 paneles, empecipia colos antecedentes del cómic nel sieglu XIX, tomando’l so desenvolvimientu nos sieglos XX y XXI, amosando la so repercusión n’exemplares d’España, Estaos Xuníos, Francia, Inglaterra, Alemaña, Italia… etc.

Quien visite’l Palaciu de Valdecarzana d’Avilés, see de les Xornaes, va afayar un Quixote atípicu. Va Poder esfrutar de modernos mangues xaponeses y coreanos col aventureru fidalgu como protagonista o del únicu cómic robláu por una muyer, Carmelina González Llión, publicación española de finales de la pasada década de los cincuenta, según aleluyas y cómics orixinales, dalgún tan pintorescu como un Quixote eróticu n’italianu.

Los conteníos espositivos encadarmense dende trés miraes so los títulos d’Aleluyas, El Quixote nel cómic y Cameos del Quixote. Asina, les Aleluyas son series d’estampes con forma de viñeta que, acompañaes con unos versos pareados nos sos pies, ilustren una hestoria. Un estilu gráficu que se consideró como l’antecedente de la historieta más próxima al cómic.

La serie El Quixote nel cómic ye un acercamientu a les obres que, dende ésti xéneru, trataron d’ilustrar les aventures del fidalgu al traviés del exemplu de variaes tires que trataron dalgunos de los capítulos más famosos de la novela de Cervantes, tollo del mandu de grandes autores como Zansky, Trubet, Llinu Landolfi, Jacovitti o Will Eisner.

La última parte del percorríu correspuende al de los Cameos del Quixote, onde s’afayen dalgunes de les ocasiones en que’l mundu del cómic fixo referencia al héroe cervantín, yá como personaxe, yá con dalguna de les sos cites más célebres, como asocede por casu, en Asterix en Hispania, Epi y Blas o La guerra de les galaxes.

L’amuesa puede visitase de forma gratuita, de llunes a vienres de 11.00 a 14.00 y de 18.00 a 21.00 hores.

Tamién te podria gustar