El “Proyectu 2018” pola Oficialidá presentase esti sábadu 23 en Xixón

La Xunta pola Defensa de la Llingua Asturiana (XDLA) presenta’l PROYECTU 2018 pola oficialidá en Xixón esti sábadu 23 de setiembre, a partir de les 12 hores, na Escuela de Comerciu, na cai Tomás y Valiente. Con esta campaña, la XDLA quier poner l’asuntu llingüísticu na primer páxina de l’axenda política del país pal cursu qu’entra.

Na presentación del día 23 va presentase’l videu de la campaña y van falar distintes persones en representación de la sociedá asturiana. Amás, yá tienen confirmada la so asistencia al actu diputaos autonómicos na Xunta Xeneral y diputaos por Asturies nel Congresu de los Diputaos, secretarios xenerales y representantes de los principales partíos parllamentarios y sindicatos mayoritarios, el rector de la Universidá d’Uviéu y el presidente de l’Academia de la Llingua Asturiana, amás d’alcaldes y conceyales de los principales conceyos del país.

Ente les instituciones que ya amuesaron estos díes el so sofitu a la presentación del proyeutu alcuéntrase l’Academia de la Llingua qu’esti martes espublizaba un comunicáu nel que ponía bien a les clares que “el respetu pola llingua asturiana ya caltrió ente los sectores más civilizaos de la sociedá, l’alfabetización de les xeneraciones más moces ye güei una realidá, agora falta esi reconocimientu oficial pa poder siguir el camín hacia la normalización de la llingua na vida de los asturianos y les asturianes” y que por mor d’ello “urxe adaptar el marcu llegal del asturianu y del gallego-asturianu a la realidá del sieglu XXI: la normativa europea esíxelo, les nueves formes de comunicación fáenlo imprescindible”.

Pala Academia, tamos nel ecuador d’una llexislatura qu’empezó cola esperanza del cambéu cola entrada na Xunta Xeneral de formaciones nueves. Y por eso, “la reivindicación llingüística nun puede permitise repetir, a una escala más pequeña, de cuatro años, l’impás y la frustración de los más de 40 años de llucha que lleva esti movimientu. Los partíos que llevaron nel programa dalguna declaración favorable a la oficialidá tienen que materializar esi determín nun proyectu de llei de reforma del Estatutu qu’igue d’una vez por toes esta situación irregular de la llingua asturiana en comparanza con otres llingües del Estáu. Ye namás cosa de voluntá, nun valen sides”.