El “Proyectu 2018” de la XDLA suma apoyos nes principales fuercies polítiques

El “Proyectu 2018” de la XDLA suma apoyos nes principales fuercies polítiques
27 xunetu 12:28 2017 Imprimir

Depués de la negativa inicial de la Conceyalía de Cultura de Xixón pa que se presentara nel marcu del Arcu Atlánticu y la correición consiguiente, el “Proyectu 2018” dela XDLA sigue’l so camín de sumar apoyos nes principales fuercies polítiques.

Depués de la negativa inicial de la Conceyalía de Cultura de Xixón a que la Xunta pola Defensa de la Llingua Asturiana (XDLA) presentara’l “Proyectu 2018 pola Oficialidá” nel marcu del Arcu Atlánticu, Carmen Moriyón, alcaldesa de la mayor ciudá d’Asturies, aconceyó cola organización y reconoció que l’actu sí tenía encaxe nel festival, qu’esti añu ta dedicáu a les llingües minoritaries d’Europa.

Con too, énte la imposibilidá temporal de que’l Proyectu 2018 se presentara d’una manera digna dientro del Arcu Atlánticu d’anguaño, l’alcaldesa comprometióse a facilitar un espaciu municipal pa dar a conocelo nos meses vinientes, cuasi seguro en setiembre. Ye de reseñar que Moriyón presentó una actitú bien diferente a la de les responsables de la Conceyalía de Cultura y reconoció la existencia d’un conflictu llingüístu n’Asturies, dalgo que ye menester solucionar, sigún asegura la XDLA nuna nota de prensa asoleyada esti xueves 26.

La XDLA quier aprovechar esta nota de prensa tamién “pa dar les gracies a les asociaciones y partíos políticos qu’apoyaron a la organización y refugaron l’actitú inicial de la Conceyalía de Cultura de Xixón, una actitú censora y irrespetuosa cola nuestra organización y con tol movimientu de reivindicación llingüística, que lleva 40 años na cai lluchando pola sobrevivencia del principal patrimoniu cultural del pueblu asturianu”.

El “Proyectu 2018 pola Oficialidá” ye una iniciativa de la XDLA que busca que nel añu 2018 s’abra la reforma del Estatutu d’Autonomía pa incluir, esplicitamente, la oficialidá de la llingua asturiana y del gallego-asturianu. Nesi sentíu, la organización sigue los contactos políticos al máximu nivel pa esplicar a tolos sectores implicaos el Proyectu. Mesmamente, el miércoles 26 de xunetu, miembros de la XDLA aconceyaron con Adrían Barbón, ún de los dos candidatos a secretariu xeneral de la FSA-PSOE, pa presenta-y la iniciativa.

Pa la organización, “nestos momentos hai posibilidá de construir el consensu necesariu p’algamar la oficialidá nel 2018 y solucionar el conflictu llingüísticu nel nuestru país. Y ye que l’actual marcu llegal del idioma, amparáu nel artículu 4 del Estatutu, ye’l que nun tien consensu, como muestren toles encuestes y la movilización constante d’una parte importante de la sociedá asturiana. La realidá social d’Asturies vese superada por esi marcu llegal y lo único que pue acabar col conflictu y dar solución pa la convivencia de les llingües d’Asturies implica, necesariamente, la reforma del Estatutu y la inclusión de la oficialidá”.

Loading Facebook Comments ...