El próximu cursu pue ser ‘online’ y presencial por veces

El próximu cursu pue ser ‘online’ y presencial por veces
19 mayu 21:47 2020 Imprimir

El próximu cursu va ser ‘on line’ y presencial por veces y con grupos d’alumnos amenorgaos, magar diz la conseyera d’Educación que caltién la esperanza de que pueda empezar de forma presencial.

Lo cierto ye que tou fai indicar que’l próximu cursu, si torna a dalguna normalidá, ye esa ‘nueva’ llena de distancies de seguridá, midíes d’hixene y mázcaros. Y por eso, sobre la mesa, la necesidá de diseñar un cursu distintu, preparáu pa la vieya normalidá pero tamién, y sobremanera, pa la nueva.

La Conseyería de Eduación yá fizo un estudiu, que nun primer analís conclúi que 230 de los 420 centros públicos y alcordaos de la rexón (esclúyense los privaos y los d’Educación Infantil) cunten con espaciu abondu y un númberu d’alumnos tal que-yos dexa garantizar la distancia de seguridá. Son centros, sobremanera, de les zones rurales, nes que posiblemente nun haya que tomar más midíes. Nel restu, la situación ye bien distinta. Nun hai espaciu pa garantizar la distancia y nun va quedar más remediu qu’instaurar les veces, que pueden ser de delles maneres. Carmen Suárez fixo referencia esti día al modelu austriacu, que consiste en que los alumnos vaigan una selmana a clase presencial y depués caltengan la enseñanza a distancia otres dos selmanes. Puede ser asina, per selmanes, o per díes alternos o inclusive por franxes horaries, dixo la conseyera, pa garantizar que’l grupu presencial nun sía mayor de 15 alumnos.

La diputada de Podemos Nuria Rodríguez plantegó estudiar qué equipamientos taríen disponibles nos conceyos pa poder allugar alumnos, dende centros sociales a ateneos. A eso súmase que Suárez defendió una «incoporación gradiada» de los más pequenos, los alumnos d’Infantil, que ye onde más problemes hai pa caltener les midíes de seguridá necesaries. Y la conclusión de too ye que s’avera un seriu problema de conciliación nes families asturianes que «ye un problema social, non de la Conseyería d’Educación». De conciliación falóse enforma na Xunta.

Mientres too eso llega, los centros asturianos reabrieron el llunes les sos puertes, col equipu directivu y el personal d’alministración. Les families van poder pidir cita previa pa dir recoyer el material escolar qu’ellí quedara. A partir del día 25 –entá nun se concretó la fecha– van poder volver a clase presencial los estudiantes de segundu de Bachilleratu, segundu cursu de los graos cimeros de FP y los de cuartu d’ESO que rican de refuerzu. Los d’Infantil, repitió la conseyera, nun van tornar.

 

  Categories: