El programa “Sé dixital” llega a la so recta final n’Avilés con 148 participantes

Un total de 148 persones encaren la recta final de la so formación dientro’l programa de formación online gratuitu “Sé dixital”, impulsáu pola Escuela d’Organización Industrial (EOI) col sofitu del Conceyu d’Avilés, la Unión de Comerciantes d’Avilés y Contorna (UCAYC) y el patrociniu d’Orange.

Concretamente, los participantes empecipiaron l’últimu módulu d’esta plataforma de formación, dedicáu a identificar oportunidaes de negociu nel ámbitu dixital. El periodu de formación arrincó’l pasáu 18 d’abril y tien una duración averada de seis semanes.

El cursu, pal que primeramente s’habilitaron 100 places, amontóse en 48 places más. Ye gratuitu y tien 20 hores de carga lectiva. Los participantes aportaron mientres dos meses a la plataforma de formación creada ad hoc pal programa Sé dixital, basada en tecnoloxía de la Universidá de Harvard y l’Institutu Tecnolóxicu de Massachusetts (MIT). Mientres esti periodu, l’alumnáu ta beneficiándose de la comunidá d’aprendizaxe de la Escuela d’Organización Industrial cuntando con tutores y dinamizadores específicos. Una vegada completen la formación, van llograr un Certificáu oficial de la EOI.

De los 148 participantes nel programa “Sé dixital” n’Avilés, un 48% son muyeres y un 52% homes. Predomina’l perfil de persones mayores de 35 años (62%), con estudios universitarios y con esperiencia entamadora (53%). El 37% de los participantes tien empresa propia y quier entamar un nuevu proyectu.

“Sé dixital” ye un programa creáu pa fomentar el tresformamientu del texíu empresarial de conceyos y ciudaes, col fin llograr una rápida y efectiva adaptación d’estes poblaciones y los sos habitantes a los retos que plantega la nueva economía dixital global.  programa, la UCAYC emprestó’l máximu espardimientu y sofitu al so desenvolvimientu.