El programa “Educando los bonos amores” va llegar a 250 escolinos

El programa “Educando los bonos amores” va llegar a 250 escolinos
26 ochobre 16:26 2015 Imprimir

El Centru d’Atención Sexual del Conceyu d’Avilés (CASA) va poner en marcha un nuevu programa d’educación y sensibilización col que pretende faer llegar a escolinos del primer cursu de Secundaria les conocencies necesaries pa “encarar les sos relaciones sentimental y sexual n’igualdá, respetu y complicidá”.

La conceyala d’Igualdá, Raquel Ruiz participó na presentación del programa que tien por nome “Educando los bonos amores” la selmana pasada y dexó claros los sos obxetivos: fomentar la reflexón sobre los estereotipos del llamáu “amor romántico” y les sos consecuencies sobre les relaciones de pareya, conocer el procesu biográficu que constrúi a homes y muyeres y a los sos deseos, sollertar sobre’l control, los celos y el dañu nes relaciones teóricamente “pasionales”, y concenciar sobre la necesidá de reconocer y curiar de les identidaes dixitales. Sollertó sobre’l repique nel últimu añu de los casos de violencia de xéneru y la so medría ente persones nueves, “ente moces y mozos que toleren estes relaciones insanes ensin saber esactamente l’orixe y les consecuencies d’estos comportamientos”.

Según desplicó la concejala d’Igualdá y Mocedá, “escoyóse a los alumnos de primer cursu d’ESO porque se considera que ye’l meyor momentu pa construyir relaciones igualitaries, respetuoses, una y bones  los y les moces nun suelen tener esperiencies previes y cunten namá cola influencia recibida pola redolada familiar, amistosu y los medios de comunicación”.

Nuna primer etapa, el proyectu va desenvolvese como “programa pilotu” demientres tres meses. Ta previsto que participen unos 250 alumnos y alumnes de 11 aules de primer cursu d’ESO, pertenecientes a dos IES y un colexu alcordáu. Van Recibir 33 hores de formación n’horariu lectivu, estremaes en trés sesiones: “Muyeres y homes, ¿de qué falamos cuando falamos d’amor? ¿Cómo rellacionamos?”; “Muyeres y homes, los nuesos cuerpos, los nuesos deseos y les nueses identidaes”; “Les hestories del amor que nos cuntaron”. Tamién van recibir formación les AMPAS y el profesoráu de los centros participantes en “Educando los bonos amores”.

  Categories:
Loading Facebook Comments ...