El programa DOLCE17 va enllenar d’ociu’l branu de la mocedá uvieína

El programa DOLCE17 va enllenar d’ociu’l branu de la mocedá uvieína
08 xunu 08:18 2018 Imprimir

El programa DOLCE17, que se desenvuelve ente’l 2 de xunetu y el 31 d’agostu en La Corredoria y Teatinos al traviés de más de 100 actividaes gratuites, va enllenar d’ociu’l branu de los y les adolescentes uvieínes.

La conceyala de l’área de Mocedá, Marisa Ponga, presentó esti miércoles 6 de xunu la temporada de branu 2018 del Proyectu DOLCE17, que se desenvuelve al traviés del Programa Ociu Xuvenil, frutu d’un conveniu de collaboración ente’l Conceyu d’Uviéu y la Fundación C.Y.S.P.A– Proyectu Home. La iniciativa, compuesta por actividaes d’ociu gratuites destinaes a los y les adolescentes uvieines de 12 a 17 años d’edá, va desenvolver de llunes a vienres del 2 de xunetu al 31 d’agostu, ente les 11.00 y 14.00 hores, nos barrios de La Corredoria y Teatinos. “Diseñemos xuna programación que s’afaiga al periodu de vacaciones, que se complemente con otres iniciatives y que, amás, facilite la conciliación de les families”, espresó Marisa Ponga. Esta temporada de branu 27 entidaes del conceyu -de les 37 que participen nel programa mientres tol añu 2017- van desenvolver un total 105 actividaes a lo llargo d’estos dos meses de branu; ente que, pela so parte, l’equipu técnicu del Programa va dirixir otres 59 actividaes.

“Sumen una ufierta global de 164 actividaes culturales, lúdiques y deportives que se van realizar a lo llargo 9 selmanes de manera ininterrumpida”, detalló la directora de la Área de Prevención de la Fundación C.Y.S.P.A.-Proxecto Home, Aránzazu Fernández. Como novedá respecto al añu 2017, señalar que s’amplía a trés el númberu de selmanes de programación d’actividaes simultánees nel barriu de La Corredoria –del 2 de xunetu al 3 d’agostu, nel CS El Cortixu, el Polideportivu La Carisa y el CJ La Corredoria- y en Teatinos –del 16 de xunetu al 31 d’agostu, nel Centru Xuvenil Santullano. Amás anuncióse que, no que va d’añu, lleváronse a cabu nel marcu del Programa Ociu Xuvenil d’Uviéu un total de 128 actividaes empobinaes a menores y nueves ente 12 y 35 años, llogrando un total de 2.383 participaciones. D’elles 1.220 fueron d’homes y 1.163 de muyeres.

Al respective de les actividaes deportives que s’ufierten nel programa DOLCE17, podrá practicase speedminton, fútbol, disc golf, aikido o axedrez, ente otres. Nel apartáu de bailles, va haber buecu para runfa fitness, break dancie o danza del banduyu. La cultura tamién ocupa un llugar destacáu, al traviés d’actividaes y talleres y actividaes como stencil, tatuaxes de henna, manualidades reciclaes, bixutería o scrap; a los cualos añedir les clases de cocina p’aprender a faer pizza y calzone, batíos saludables o pastelería del mundu.

Pa participar en cualesquier d’elles va haber de presentar una autorización roblada pola persona tutora y una fotocopia del documentu d’identidá del neñu o la neña –DNI, NIE, pasaporte, llibru de familia o equivalente. Esta documentación va ser necesaria pa participar cualquier actividá de DOLCE17 que se desenvuelva en 2018. Los y les menores pueden inscribise primeramente, o’l mesmu día qu’alleguen a l’actividá, nel Centru Xuvenil Santullano o nel Centru Xuvenil La Corredoria, siempres qu’haya disponibilidad de places.

Pa mayor información, accesu a la programación ya inscripciones, pue consultase la web www.oviedo.es/ociojuvenil, o bien dirixise a los Centru Xuveniles de Santullano y de La Corredoria de llunes a vienres -de 9.00 a 14.00 hores y de 10.30 a 14.00 hores, respectivamente- al traviés de los teléfonos 984 08 37 23 / 985 21 52 62 984 28 25 23 / 984 28 24 52 o de los emails ociojuvenil@oviedo.es y cjcorredoria@oviedo.es.

Más información

 

  Categories: