Portada Comunicación El programa de la RPA “Nomes d’Asturies” va emitir dos especiales dedicaos a la Revolución d’Ochobre

El programa de la RPA “Nomes d’Asturies” va emitir dos especiales dedicaos a la Revolución d’Ochobre

by asturnet

A piques de cumplise’l 75u aniversariu de la Revolución d’Ochobre y de la comuña asturiana, el programa “Nomes d’Asturies” de la RPA va a dedicar dos capítulos especiales a remembrar esti fechu cimeru na nuesa historia. El programa va utilizar la fórmula de radio-teatru, pa dramatizar col máximu realismu munches de les escenes de la Revolución: dende les reuniones del Comité Revolucionariu, la toma del cuartel de Sama o les barricaes en Xixón, a la llegada de la llexón y los regulares a Uviéu o la represión y tortures que vinieron dempués.

El guión, de Chechu García, basáu na obra “revuelta n’Asturies” del premiu Nobel, Albert Camus, va a amestar el testu dramáticu del escritor francés con fechos y personaxes reales de la revolución asturiana, a los que van dar voz l’equipu d’actores del programa, ente ellos Eva Vallines, Azucena Álvarez, Carmen Lorenzo, Chechu García, Roberto Corte o Silvino Torre.

La emisión de los dos capítulos dedicaos a la Revolución d’Ochobre será los prósimos sábados 3 y 10 d’Ochobre de 14 a 14:30 hores na Radio del Principáu d’Asturies RPA.

El primer de los capítulos tará dedicáu al entamu de la revolución, les primeres victories de la U.H.P., la toma de les cuenques mineres y d’Uviéu.

Nel segundu capítulu, va facese un repás a la comuña asturiana, a les táctiques de les tropes gubernamentales, al fracasu de la revolución y la represión que vieno de siguío.

Tamién te podria gustar