Portada Conceyos El programa ‘Bono Xixón’ amplía 20 díes el plazu d’inscripción de negocios

El programa ‘Bono Xixón’ amplía 20 díes el plazu d’inscripción de negocios

by redacción asturnews

La comisión de siguimientu del programa Bono Xixón, integrada polos representantes de la mesa de concertación social y personal de Xixón Impulsa, alcordó esta selmana pasada ampliar el plazu d’inscripción de negocios  en dichu programa hasta’l 30 de setiembre.

El plazu inicial, afitáu hasta’l 10 de setiembre, amontase d’esta forma 20 díes, mientres los cualos va intensificase la captación d’establecimientos para la so adhesión al programa.

‘Bono Xixón’ ye una iniciativa puesta en marcha pol Conceyu de Xixón que, dotáu con un millón d’euros, busca fomentar el consumu n’establecimientos locales distribuyíos en trés categoríes, comerciu, hostelería y cultura, que la so adhesión al mesmu ye absolutamente gratuita.

Nel marcu de la comisión de siguimientu alcordóse igualmente la redistribución de les cifres, primeramente previstes nes bases, en función de los datos d’establecimientos xuntaos por categoría, xusto con anterioridá al entamu de la vienta de los bonos, que va empezar el 15 de setiembre. Coles mesmes redistribuiranse tamién el númberu de bonos a la vienta, según les adhesiones que se vaigan produciendo polos distintos distritos. D’esta miente, el volume de bonos que se van comercializar por categoría y distritu, van tener una correspondencia directa col númberu d’adhesiones efectuaes.

Los bonos que s’adquieran al traviés d’esti programa van poder consumise dende’l mesmu momentu de la so alquisición hasta’l 30 de payares.

Tamién te podria gustar