El profesoráu d’asturianu aconceya llamáu por CCOO

El Sindicatu d’Enseñanza de CCOO convocó na tarde del 17 de xineru al profesoráu de Llingua Asturiana d’Asturies nel IES Xovellanos pa tratar delles cuestiones rellacionaes cola situación de l’asignatura, analizando datos de los años caberos y la inclusión de conteníos curriculares n’Infantil.

Na xunta analizáronse los datos d’escolarización de los últimos años y tratóse’l tema de la inclusión de conteníos curriculares de llingua y cultura asturianes na Educación Infantil a partir del cursu 2018/2019. Falóse tamién de les dificultaes qu’afecten anguaño al enseñu de la Llingua Asturiana y de les necesidaes que se tán detectando y que podríen surdir a mediu plazu en casu d’algamase la oficialización del asturianu.

CCOO considera que la normalización de la materia pasa por inxerila nel catálogu d’especialidaes docentes, garantizando al profesoráu que la da la posibilidá d’acceder a los procesos selectivos realizaos nel ámbitu público.

Reclamóse, tamién, la inclusión de les places de Llingua Asturiana na plantía de los centros y l’ampliación de la presencia curricular del asturianu a traviés d’instrumentos como los planes de llectura, los proyectos llingüísticos de centru o la incorporación real de conteníos tresversales. P’acabar, reivindicóse la oficialidá del asturianu, l’unicu marcu xurídicu que se considera amañosu pa regularizar les condiciones llaborales del profesoráu y llograr un aprendizaxe llingüísticu efectivu.