El profesorao asturiano ye mayoritariamente mayor de 55 años y muyer

El profesorao asturiano ye mayoritariamente mayor de 55 años y muyer
15 setiembre 17:08 2015 Imprimir

Mayores de 55 años y mayoritariamente muyeres. Ye’l dibuxu del profesorao asturiano que fai SUATEA y qu’oldea col fechu de que nun haya una sola muyer nel organigrama de la Conseyería en primaria, secundaria y FP.

SUATEA fizo un estudiu basándose nos datos apurríos pola mesma alministración nel censu correspondiente a les elecciones sindicales celebraes nel mes d’avientu de 2014, datos que faen referencia tantu a la edá como’l sexu y la distribución por conceyos del profesoráu.
Y los resultaos non por previsibles son menos llamativos: Una apolmonante mayoría del profesoráu son muyeres, con un 88% n’Educación Infantil y Primaria, un 66% n’Educación Secundaria y un 46% en FP. Nel total de los cuerpos les muyeres son un 71%. Trátase polo tanto d’un sector onde la presencia femenina ye dafechamente mayoritaria lo qu’oldea cola cúpula de l’Alministración, qu’acaba de nomar n’Educación a cuatro directores xenerales un conseyeru ensin una sola muyer nel organigrama relativu a enseñanza primaria, secundaria y FP. lo que pa SUATEA fai que sobren los comentarios.
Otru datu relevante sigún l’estudiu de SUATEA ye’l de la edá del profesoráu: Hai un porcentaxe pergrande de profesoráu mayor de 55 años, que si pudiera aportar al amenorgamientu de xornada que llegalmente ta contemplada, dexaría la incorporación de nuevos docentes al sistema favoreciendo una transición menos traumática na actividá docente. Nel momentu de la publicación de los datos referentes al censu, en 2014, el profesoráu que superaba esa edá suponía un 26% del total. Y el de menos de 35 nun algamaba nin el 10% de la plantiya docente.

Sigún los cálculos de SUATEA, “los próximos cuatro años unos 2500 docentes podríen tar en condiciones d’aportar a la xubilación” lo que va facer que “casi la metá de la plantiya podría llegar a tar compuesta por profesoráu interín, si nun s’actúa drásticamente convocando una media de mil places docentes al añu”, colo que polo menos consiguiríase amenorgar el porcentaxe d’interinidá a un 16%, bien alloñáu del oxetivu del @8%.

Al respective de la distribución por conceyos, “constátase que la casi la metá del profesoráu ta desempeñando’l so trabayu nos trés grandes conceyos asturianos. Esto ye significativu en FP, onde se ve claramente cómo’l númberu de profesoráu supera en 10 puntos al de primaria. Esto quier dicir que nos conceyos más pequenos la ufierta de FP y en menor midida la de Bachilleratu ye porcentualmente menor de lo que s’esperaría en función del alumnáu esistente en primaria“.

Otru elementu relevante dientro de los 10 conceyos con mayor númberu de profesoráu “ye la distinta distribución na campana d’edaes según la situación de cada unu d’ellos. N’Uviéu y Xixón el númberu de docentes con edaes penrriba los 55 años ye significativamente eleváu. Otra manera, en conceyos como Cangas destaca’l númberu de profesoráu menor de 40 años. Ensin dulda l’altu porcentaxe de docentes interinos nesi conceyu tien enforma que ver con esa situación”.

 

Loading Facebook Comments ...