El procesu participativu del barriu del Cristu n’Uviéu celebra un taller

Un taller participativu abiertu a la ciudadanía que se desenvolvió nel Auditoriu Príncipe Felipe  amosó que los vecinos d’el Cristo n’Uviéu apuesten por caltener zones verdes y combinar l’usu residencial col aprovechamientu de los edificios p’actividaes sociales y de promoción económica.

El procesu participativu llanzáu pol Conceyu d’Uviéu al traviés de la Conceyalía de Participación d’Ana Taboada (Somos) en collaboración col Gobiernu rexonal pa buscar soluciones a los usos provisional y definitivu de la edificación hospitalaria del Cristu tuvo esta selmana pasada una de les sos últimes sesiones antes de cerrar les conclusiones: Un taller participativu abiertu a la ciudadanía que se desenvolvió nel Auditoriu Príncipe Felipe y que tuvo empobináu polos técnicos de la empresa axudicataria del procesu, Paisaxe Tresversal.

Los asistentes al taller trabayaron dalgunos de les resultancies llograes hasta agora nel procesu. Trátase, en tolos casos, de resultancies y conclusiones provisionales, al nun rematar entá’l trabayu de campu. Ente ellos destaquen, por casu, les propuestes que les vecines y vecinos fueron apurriendo pal aprovechamientu y rehabilitación de los edificios d’especial relevancia. Por casu, ente les propuestes apurríes pola ciudadanía destaca’l treslláu del actual centru de salú del Cristu al antiguu edificiu de consultes esternes del HUCA.

Una residencia de mayores y estudiantes ye otra de les propuestes, nesti casu p’allugala nel Institutu Nacional de Silicosis. Tamién se propunxo la dotación d’un centru d’estudios ya investigación integráu con usos que promuevan l’actividá económica nel  Centru Maternu Infantil. En Policlíniques (los Hongos) quien participaron nel procesu apuesten, poles característiques d’esti espaciu, pola combinación de distintos usos: un hotel d’asociaciones, un centru cultural o un viveru d’empreses venceyáu a la Universidá d’Uviéu.