El Principáu va enllantar la tutorización pa fomentar vocaciones científiques nes alumnes

El Principáu va enllantar la tutorización pa fomentar vocaciones científiques nes alumnes
14 febreru 16:01 2020 Imprimir

El Principáu va enllantar la figura’l tutor pa fomentar vocaciones científiques nes alumnes porque n’Asturies, la fienda de xéneru ente l’alumnáu qu’opta por estudios rellacionaos cola Ciencia, la Tecnoloxía, la Inxeniería y les Matemátiques -les conocíes como disciplines STEM, poles sos sigles n’inglés- ye más qu’evidente cuando se repara la composición de les aules universitaries y de los ciclos formativos de Formación Profesional.

El númberu de muyeres qu’opta por enseñances venceyaes cola ciencia y la tecnoloxía ye bien inferior al de los homes. L’informe Asturies 4STEAM, presentáu esta selmana n’Uviéu pon-y cifres: na Universidá d’Uviéu, trés de cada cuatro alumnos matriculaos n’estudios d’inxeniería son homes.

La fienda revélase entá más acusada si la lente ponese sobro los centros de Formación Profesional. Ente que más de la metá de los mozos opten por matricular se nun ciclu formativu de les ocho families profesionales de STEM, «malapenes un 12% de muyeres decide siguir esi tipu de formación», pon de manifiestu l’estudiu realizáu por Valnalón pa la Conseyería de Ciencia, Innovación y Universidá.

L’asuntu funde los sos raigaños xusto na etapa anterior a la universidá, nel Bachilleratu, onde la modalidá científica ye escoyida pol 46% de les rapaces frente al 55% de los mozos. Les cifres d’Asturies tán percima de la media nacional, «pero eso nun puede ser motivu de preste, sinón de sacalliñu p’ameyorar», reconoció’l conseyeru de Ciencia, Borja Sánchez.

Daqué falla ende. Porque, y este ye otru aspeutu que se recueye nel informe, el nivel de competencies del alumnáu asturiano en ciencies y matemátiques «nun paez representar un problema de primer orde». Tal que constaten la prueba TIMSS (dirixida a alumnos de cuartu de Primaria) y la de PISA (empobinada a los estudiantes de cuartu cursu de la Enseñanza Secundaria), más del 75% del alumnáu que se sometió a estes pruebes consiguió puntuaciones entemedies o altes. Revelen estos estudios tamién que les diferencies de xéneru nun son n’absolutu determinantes nes resultancies. Sí lo ye, sicasí, el nivel socioeconómico del alumnu, unu de los factores sobro los que, según l’autor del informe Asturies 4STEAM, Iván Diego Rodríguez, tendría d’actuase.

El Principáu, tal que reconocieron los conseyeros de Ciencia y Educación, quier amontar les polítiques actives que favorezan una mayor presencia femenina nel ámbitu de la ciencia, y la so permanencia nella. Empezar per potenciar toles vocaciones científiques que se detecten na enseñanza Secundaria y que «lamentablemente nun lleguen nin a la Universidá nin a la Formación Profesional».

  Categories: