El Principáu quier reformar la Llei d’Asturianía p’adaptala a la realidá actual

La nueva realidá de la emigración asturiana nel esterior y les diferentes situaciones que viven los residentes n’Europa o n’América son los motivos polos que’l Gobiernu del Principáu quier camudar l’actual Llei d’Asturianía. El III Congresu de les comunidaes asturianes nel esterior va ser el marcu pa plantegar los cambios na lexislación d’anguaño.

El Conseyeru de Xusticia y Esteriores Francisco José García Valledor anunciò que la Llei d’Asturianía tien d’adaptase a les distintes realidaes que viven los emigrantes por mor de los sos llugares de residencia, por situación económica o estremaes edaes. Nesi sen Valledor consideró necesario reformar l’actual lexislación tocante a los asturianos rsidentes nel esterior. El Conseyeru afirmó que los emigrantes constitúin “un capital social inestimable pa construir Asturies como país”.