El Principáu pide más implicación a les empreses pa impulsar la FP dual

El conseyeru d’Educación, Genaro Alonso, reclamó esta fin de selmana pasada más implicación empresarial p’ameyorar el sistema de Formación Profesional dual nel ámbitu educativu, mientres la inauguración de les xornaes ‘FP dual, motor d’integración y crecedera’, entamaes por FADE y Bankia.

«Queremos reclamar a les empreses más collaboración porque ye daqué bien fecundu pal alumnáu y el sistema educativu. Amontar hasta’l 33% el númberu d’hores que l’estudiante pasa nos centros de trabayu, conciliándolo cola formación na aula, ye importante por que el alumnu vea la realidá d’otra manera y tamién pa les compañíes qu’empresten collaboración», indicó.

Según informó l’Executivu, Alonso avanzó qu’el so departamentu yá trabaya nel desenvolvimientu del cuartu programa de FP dual, que va simplificar los procedimientos de xestión p’amontar la participación de centros y entidaes.

Al so xuiciu, Asturies tien «un llargu camín por percorrer» hasta llograr qu’el 60% de los alumnos de FP realicen esta modalidá como asocede nos países centroeuropeos y tase avanzando «por qu’al mediu plazu esto sía una realidá» pero rique d’una mayor implicación de les empreses. Pa considerar la FP como dual les hores de formación que l’alumnáu pasa na empresa tienen de suponer, siquier, el 33% del total del ciclu formativu polo que’l tercer programa impulsáu pola Conseyería dexó amontar el númberu d’hores que los estudiantes d’estes enseñances pasen nos centros de trabayu de 380 a 800, en dellos casos, y hasta 1.000 n’otros.

Nel tercer programa de FP dual participaron 28 centros educativos, 265 estudiantes de 69 ciclos formativos y 169 empreses.