El Principáu estudia centralizar los documentos parroquiales pa caltener el drechu consuetidunariu

Documentar vezos y costumes ancestrales pa poder caltenelos na vida moderna. La Conseyería de Xusticia, Seguridá Pública y Relaciones Esteriores ultima una campaña pa ‘sacar del caxón’ el drechu consuetidunariu asturianu y promover la so sobrevivencia. Pa ello plantega la recuperación de la documentación agora espardida nes parroquies rurales y la so posible centralización nel Archivu hestóricu d’Asturies.

Según quedó asoleyao nuna entrevista que güei mantuvieron el conseyeru de Xusticia, Francisco Javier García Valledor; la directora xeneral del ramu, Pilar Jiménez; y el presidente de la Federación Asturiana de Parroquies Rurales, José Fernández, el 90 por cientu de la documentación ta inda por esplorar, y en dellos casos contién información sobro les primeres esperiencies municipales nel sieglu XVIII.

Son llibros d’actes, memories de contabilidá y testos que falen d’engarradielles vecinales qu’afitaron les normes básiques de convivencia ente los asturianos qu’habitaben el mediu rural -la inmensa mayoría hasta’l sieglu XX- a partir de la costume de cada llugar, acatada polos vecinos con rangu de llei.

Pero pesie a la riqueza d’esos fondos documentales, José Fernández alertó güei de que munchos de los vieyos ‘papeles’ acumulaos nes parroquies rurales tán deteriorándose ensin igua por mor dela inacción política, y otros paecen yá irrecuperables al tar yá nes colecciones de propietarios individuales.

Pa enveredar la situación, la conseyería que dirixe Valledor empezará por entamar unes xornaes de divulgación que dexen clara la relevancia de los documentos nos que s’asoleya el drechu consuetudinariu asturianu, y pondráse a trabayar darréu nuna posible centralización de los fondos documentales de les parroquies rurales, que mantendríen la titularidá de los ‘papeles’.