El Principáu echa a andar una web informativa sobro la Constitución Europea con conteníos n’asturianu

Información y discutiniu con tres meses d’antelación. El Gobiernu autonómicu presentó esta mañana n’Uviéu una páxina web sobro la Constitución Europea qu’inclúi información por defectu dafechu en llingua asturiana y que ye’l puntu más visible d’una campaña institucional que, según el conseyeru de Xusticia y Relaciones Esteriores, Francisco Javier García Valledor, quier alitar l’alderique ente los ciudadanos.

Esi ye ún de los oxetivos de la campaña, que s’echa a andar colos güeyos puestos nel referéndum -non vinculante- pol qu’España se pronunciará a favor o en contra del testu constitucional el prósimu 20 de febreru. Los otros dos pegollos de la iniciativa’l Principáu son, según Valledor, informar a los asturianos sobro tolo que cinca a la Constitución y promover la participación de los ciudadanos nel propiu referéndum.

Nel nuevu sitiu web del Gobiernu, que ta desendolcáu en billingüe pero cuya versión asturiana apaez automáticamente al acceder a la páxina, l’usuariu pue atopar documentos referíos al testu constitucional, noticies d’actualidá y una axenda d’actos actualizada. Amás d’ello, la web incorpora un foru d’opinión nel que l’Executivu asturianu responderá les entrugues de los navegantes.

Nel so envís d’abrir un discutiniu sobro la Carta Magna d’ámbitu européu, firmada’l pasáu 29 d’ochobre en Roma polos 25 xefes de Gobiernu de la Unión, el Principáu pondrá en circulación un resume de la Constitución, apoyará’l discutiniu nos medios de comunicación y entamará conferencies, la primera de les cuales pronunciarála el prósimu vienres n’Uviéu el secretariu d’Estáu pa la UE, Alberto Navarro.

La firma de Navarro rubricaba una carta empobinada al conseyeru de Xusticia, Seguridá Pública y Relaciones Esteriores del Principáu, Francisco García Valledor, na que l’altu cargu afitaba’l deséu del ministeriu d’Esteriores de que l’asturianu seya oxetu d’una atención “especial” na UE pero negaba la posibilidá de consideralu como llingua oficial n’Europa.

Web del Principáu sobro la Constitución Europea